Bayik’î vistvîrî ke AKP verra kurdan û PKK konseptê herb visto dewre û niya va: “Nika Bakur de, herbê-lejê bê sînor rameno. Tarixa tirkiye de, qe jew wext vera kurdan lejê winayin nêviraziyabi. Davutoglu zî ard ziwan ke: ‘verra terorî 30 serro lejê winayin nêviraziyabi’, rast o. Ne wextê 12’ê Îlone û ne jî wextê Çîler de sûkî zey nika nêdaybî verê tanq û topan. Sûkî veng-tol nêbibî û merdimî wina eşkere nêkişiyayîbî. Nika winî kenê. Lazimo şarê ma, ena rastîn bivîno. Yanî wazenê Hereketê Azadiyê Kurd heme hetan ra bigirê jew çemberî. Heme cayan ra wazenê Hereketê Azadiyê Kurd darbe bikirê. Çimki AKP vînena, verniyê înan de tenya hereketê serbestî, kurdî vindenê.
Konseptê zey ‘99’î dewre de yo
Cemîl Bayik’î hayr ant konseptê serra ‘99’î ser û wina va: Wa şarê ma, na rastîn fam bikero. Wexto ke komployê maben-netewî viraziya, hedef Rayver Apo bi. O wext waziya Rayver Apo’yî Suriye ra vejerê û Hereketê Azadiyê Kurd tasfiye bikirê. Nika jî, eynî wastena dewleta tirk ramena. Wazenê rayverînê Hereketê Azadiyê Kurd darbe bikerê. Wazenê tesîrê gerîla bişikînê. Wazenê şarê kurd bê tesîr bikerê. Coka konseptê nikayî, şibeno konseptê serra 1999’î. Nika teniya jew ferq esto. O wext, xeylê dewletan planî miyan de ca girotê. Nika winî niyo.
Ê dê xo tesfiye bê
Bayik’î ard ziwan ke, zey verî nika jî planê dewleta tirk ê tesfiyekerdişê PKK nêtepişeno û wina vat: Wastenê dewleta tirk zey serra 1999 o. La belê Hereketê Azadî zey ê çaxî niyo. Tirkiye hinî se kena wa bikero, nêşena verniyê Hereketê Azadiyê Kurd bigîro. Kam ke wazeno Hereketê Azadiyê Kurd tasfiye bikero, do bi xo tesfiye bibo. Senî ke veriya coy zî wastî PKK tesfiye bikerê, bi xo tesfiye bî, eynî çî do bîro sereyê Erdogan û Davutoglu zî.
Verra êrişan bêveng nêmanê
Bayik’î vera êrişan wina veng da kurdistanijan:
Wa şarê ma, binê her şertî de wayirê xo bivejiyo. Heme leteyî wayirê xoverdayişî bivejiyê. Wa qe jew wext cayê xo, dew, sûk, mehle, keye û welatê xo terk nêkerê. Eke merdiş yeno, wa welat de bîro. Wa weşîn jî û merdiş zî, teverê welatî de nêbo. Bayik’î dazanayin ke ê dê dersê tarixî bidê Erdogan û Davutolgu û wina vat: Eke ma bikişê, ma dê verî ra hin bi quwet bivejiyê verniyê înan. Çîler jî wextê xo de va, ‘ma dê ya biqedînê ya biqedînê’. La bi xo qediya. Gerek şarê ma, eynî çî biyaro sereyê Erdogan û Davutoglu jî.
Bayik’î veng da şarê kurd û waşt ke, verra tehdît û êrişan bê veng nêmano û wina va: “Gerek Her lete, verra qirkerdinê siyasî werzo ser pay. Wa qe kes nêvajo ‘wija bakur o, tiya çiyê nêbeno’. Hinî kamîn leteyê kurdistan’î de çiyê bibo, tesîr letteyê bînî jî keno. Hewl û xirab tesîrê pêjewîn keno. Kurd heme ca de kurdî yê. Eke jew ca tesfiye bibo, cayê bîn zî tesfiye beno. Cok ra gerek heme cayan de, kurdî werzê pay û wayirê pê vejiyê.
Wazenê PKK û PDK biyarê pêver
Hevserokê Konseyê Rayverîn ê KCK Cemîl Bayik’î derheqê rewşê Rojawa û Başûr de jî mesajê muhîmî day. Bayik’î vist vîrî ke tirkiye wazena PKK û PDK biyaro pêver û quwetanê başûr ra wast ke, hesas hereket bikerê. Bayik’î herzewbîn aşkere kerd ke, tirkiye bi sebebê planê ci yê Cerablûs xeripina, teyareya rûsya vist war.
Bayik’î aşkere kerd ke dewleta tirk pêrokîn leteyan de, siyaseta herbî û dişmeniya kurdan esas gêna û PDK ra waşt ke, nîro kayanê tirkiye. Bayik’î vist vîrî ke, “gerek kurdî vera zilm û faşîzmê dewleta tirk jûwîna xo bi qûwet bikirê.
BEHDÎNAN