Endamê Konseyê Rayverîn ê PKK Duran Kalkan ke ANF rê qisey kerd vist vîrî ke tenya kurdî dûştê faşîzmî xover danê. Kalkan ke derheqê zextanê vera çapemenîye ser de qisey kerd va, enê hewldayenanê bêvengkerdişê çapemenîya azad, zey hewldayenê nimitişê sûcan hesibna û vindernayişê weşanê Med Nûçe TV û Newroz TV zey eyb û şermê Fransa hesibna.
Endamê Konseyê Rayverîn ê PKK vist vîrî ke mabenê Erdogan û Hîtlerî de ferq çinyo û va, ‘Erdogan Hîtlerî waneno û goreyê ey hereket keno. Kalkan'î sernî de hayr ant serraçarayişê Komployê maben netewî yê vera Rayverê Şarê Kurd Abdullah Ocalanî ser û şexsdê şehîdanê "şima nêşenê rojê ma tarî bikerê de” heme şehîdê azadîye vîr ardî. Kalkanî eleqe ant kerdenanê hukumetê AKP ê vera Ocalan'î ser û da zonayen ke AKP wazena Komployê maben netewî biramno, cok ra tecrîd kerdo xorîn û siyasetê lejî kerdo vêşî. Kalkanî vist vîrî ke xeylê quwetê ke komplo de ca girotî, hinî xeletîyanê xo (şaşî) xo qebûl kenê va, “iyê ke komplo plan kerdî, siyasetê xo vurnenê. AKP û faşîstê zey ci zî, iyê dê wextekê kilmî miyan de bin bikewê.”
Bêvengî felaket o
Endamê Konseyê Rayverîn Kalkan'î qalê faşîzm û dîktatorînê Erdogan û AKP zî kerd û wina vat: “Wazenê heme venganê ciya bibirnê. Wastenê weşîya azad û demokratîk werte ra hewadê (wedarnê). Coka zey xîntan (bomî) hêriş kenê. Bi taybetî kurdan hedef gênê. Şarê Kurd, bi rayverîna Rayver Apo de vera faşîzmî xo ver dano. Ma her hetî ra xo ver danê. Nika, tenya jew quweto ke vera AKP xo ver dano mendo, o zî Hereketê Azadîyê Kurdistan o.” Kalkanî aşkere kerd ke dûştê faşîzmî de bêvengmendiş felaket o û qaîdeya ‘bêveng meman, eke ti bêveng bimanê dor yena to zî’ vist vîrî û va ganî ma seba Tirkîye nayî dibare bikerê. Kalkanî va, bi bêvengmendişî, bi çewtkerdişê milî dûştê faşîzmî de nîno vindernayiş.
Erdogan Hîtlerî waneno
Kalkanî hayr ant zext û zorvajîyanê ser çapemenîya azad û girotişê televîzyon û radyoyan zî, zey hewldayenê AKP, yê nimitişê sûcanê xo hesibna vat: ”Mabenê Erdogan û Hîtlerî de ferq çinyo. Kes vano qey, o Hîtlerî waneno û goreyê ey hereket keno. AKP çapemenîya Fetullahijan bêveng kerd. Çapemenîya Aydin Doganî kerd vatoxê xo. Tenya çapemenîya kurd û çend sazîyê demokratîkî mendbî, bi qerarnameyan înan zî girotî. Wazeno bi bêvengkerdişê çapemenîya azad, sûcanê xo binimnê.”
Fransa teslîmê dîktatorîna Erdoganî bîya
Endamê Konseyê Rayverîn ê PKK Duran Kalkanî herzewbîn hayr ant pîyakarîya şîrketê EutelSAT bi AKP û vindernayişê weşanê Med Nûçe TV û Newroz TV ser zî û nayî zey eyb û şermê Fransa hesibna. Kalkanî vist vîrî ke Fransa de Partîya Sosyalîst îxtidar a û persanê zey ‘Fransa netîceyê kamcî tawîzan de waştenanê AKP ana ca?’ ‘Sosyalîzmê Fransa kotî de mend?’ kerd. Dûran Kalkanî va, winî ayseno ke Fransa teslîmê dîktatorîna faşîst ê Tayîp Erdogan'î bîya.
ANF / BEHDÎNAN