Karayilan'î vist vîrî ke PKK wextê xoyê en quwetin ra ravêreno û wina vat: PKK jû gam bîle peyser meçekiro. Kurdistan welatê ma yo. Iyê welatê ma terk bikirê. Ê îşgalkarê. Ancax artêşa îşgalkar, jew ca de zilm kena û keyanê şarî veşnena.
Ma bêalternatîf nîyê
Karayilan'î eleqe ant wastenê xorayverîn ê şarê kurd ser û wina vat: Heveyê quwetê maben-netewî û çoşmeyê dostî, serva aştî veng danê ma. La belê nika zaf rind eşkere biyo. Eke ena dewleta AKP zîhniyetê faşîst û nijadperest terk mekiro, êrişanê bê îradekerdinê şarê ma biramo, o çax mayê jî raya xo biweçînê. Ma bê alternatîf niyê. Ma mûhtacê înan niyê. Kurdistano xoser jî, enê demî de şeno bêro rojev. Alternatîfê ma estê. Wexto ke jû dewleta bi komkişten, tifînganê giran û rijnayinê sûkan cewab bido, wastenê xorayverînê demokratîk ê masûmane, o çax mayê jî raya xo avirnê. Xorayverînê Demokratîk teniya jû ray niya. Rayê bînî jî estê.
Karayilan krîzê AKP miyan ser jî qisey kerd û vat: “Sebebê krîzê esasî ê AKP, binkewtinê ci yo. Eke zey vanê, ser bikewtayê, mabenê înan de krîz nêvejiyayê. AKP û Erdogan wazenê ma û şarê ma bê îrade bikirê û tasfiye bikirê. Coka faşîzmê xo kerdo vêşî. Ma vera enê faşîzmî xo ver danê. Gerek Tirkîye jî çoşmeyê aştîwaz û demokratîk, hereketê sosyalîstî xoverdayişê kurdan het ca bigirê. Kurdana piya bloqê demokrasî ronê. Eki ma piya vera faşîzmê Erdogan xo ver bidê, mayê xo ver bidê.“
Ray medê sazgehanê dewlet
Karayilanî siyasetê nikayî zey siyasetê dewleta tirk ê serra 1925an hesibna û va hinî nêşenê bi siyasetê serra 1925î ser bikewê.
Karayilan serva wayir-vejiyayinê cayanê xorayverîn jî wina veng da: “Wa heme şarê Kurdistanî û demokratê Tirkîye, rijnayinê Şirnex û Nisêbîn temaşe mekirê. Wa şarê ma û çoşmeyê demokratîk û saziyê welatperwerî şirê Şirnex û Nisêbîn. Wa meviradê enê sûkî jî, zey Gever û Sur birijiyê. Hetta şenê wina raya newî akerê. Tewrê kampanyayê alîkarî bibê û sûkanê xo newe ra ronê û ray medê saziyê dewlet ê zey TOKÎ.“
NAVENDÊ XEBERAN