Cayê medeniyetan
Hîlar, Heskêf, Qelaya Xarpête, Wanî, Riha, Koyê Kommagene û sewbîna... Heme nê semedî wexto ke bêrê pêhet welatê ma beno cayêko biqîymet. Tarîx de her wext dewletan mîyan de nêameyo parekerdiş. Zaf medenîyetî tîya de ameyê meydan. Sûmer, Asûr, Babîl, Elam, Akad, Hûrrî, Mîtannî, Kommagene…La her wext pêrodayîşan dewam kerdo. Hema zî dewam kenê. Welatêko wina zengîn balê dewletanê kolonyalîstan anceno.1923 de pêwerêameyîşê Lozanî de welatê ma bî 4 parçe. Çira? Welatêko zengîn... Welatêko bi kultur, bi zanayîş. Ewro roj wezîyet senîn o?
Ganî Kurdî qiymetê hardê xo bizanê
Ewro, Mûsil ra heta Amed, Efrîn pêrodayîşî estê. Nê pêrodayişî çiçî yê? Ê kamî yê? Merdim nêşeno çîyek vaco. La çiyek eşkera yo, nê pêrodayîş û şeran de fonksîyonê Kurdan zaf çinyo. Zanayîşê Kurdan kemî yo. Xo mîyan de yew polîtîka çin a. No semed ra her wext nê welatî de şar yeno xapênayîş. Tirkîya, Îran, Iraq û Surîye wazenê ke ummeta Îslamî miyan de bibê rayver. Labelê wexto ke meseleya Kurdan yena rojdem, o wext heme çî xo vîr ra beno.
Konjoktor jûbiyayiş ferz keno
Polîtîqayê nê 4 dewletan yew bena. No semed ra ganî Kurdî qiymetê erdanê xo û cayê xo bizanê. Goreyê şîyayîşê dinya jeostratejîyêko muşterek ronê. Dewletbîyayîş ya zî xorayîrberdiş, federasyon, otonomî zaf çîyê muhîmî nîyê. Labelê zanayîşê şarî muhîm o. Zanayîş bi wendiş, nuştiş, xoverdayîş û bi cesaretan beno. Keye de roniştiş reyde kes nêbeno zana. Ewro konjoktor yewbîyayîşê na millete wazeno. Rayverî ganî seba waştişanê xo nê firsendê tarîxî vindî mekerê.