Di 18'ê tîrmeha 1993'an de li Zozana Sundusê ya navçeya Mukus a Wanê, 24 kesên ku piraniya wan zarok û jin bûn hatin qetilkirin û li ser komkujiyê 20 sal derbas bû. Ev komkujî di nav gel de wekî 'Komkujiya Sundusê' tê binavkirin û di salvegera komkujiyê de ji aliyê Komeleya Mafên Mirovan (ÎHD) MAZLUM-DER û Baroya Wanê li cihê komkujiyê merasîmeke bîranînê hat lidarxistin. Piştî ku saziyên civakî bi komî çûn navçeya Mukusê, li vir bi tevlibûna welatiyan heta cihê gora 24 kesan meş hat lidarxistin û piştî meşê li ser goristanê daxuyanî hat dayîn.

Serokê Baroya Wanê Murat Tîmur diyar kir ku ji aliyê Serdozgerê Komarê yê Vestanê lêpirsîn hat destpêkirin û piştre dosya şandin Serdozgeriya DGM'ê ya Amedê û heta niha ji bo tespîtkirina kujeran tu lêkolîn nehatiye kirin. Tîmur anî ziman ku ev komkujî sûcê mirovahiyê ye wiha got: "Ger lêpirsin ji ber hinceta demborî bê girtin, ev yek li dijî hiqûqê û dewleta hiqûqê ye." Piştî axafina Tîmûr welatiyê bi navê Sabahattîn Samsa ku di komkujiyê de dayika wî hatibû qetilkirin û Ahmet Sevgîlî ku di komkujiyê de birîndar xilas bûbû axivîn.
Piştî merasîma li ser goristanê girseyê xwestin heta Zozana Sundusê meş li dar bixin, ji ber ku polîsên sivîl bi kamerayê dîmen digirtin, di navbera polîs û girseyê de alozî derket. Welatî piştre çûn Zozana Sundusê, mermî û kincên kesên ku hatibûn qetilkirin hatin berhevkirin. Li cihê qetlîamê demên hestiya hatin jiyîn û bername piştî xwarina fitarê bi dawî bû. 

DÎHA/WAN