Kongreya Civakî ya Demokratîk (KCD), encama civîna xwe bi raya giştî re parve kir. Di encamnameyê de pirsgirêka mexdûrên erdhejê, rewşa Rêberê PKK’ê Abdullah Ocalan û makeqanûna nû hate nirxamdin. Di encamnameyê de hate diyarkirin ku li gel rayedarên dewletê soz dane gelê Wanê jî hêj mexdûriyeta Gelê Wanê çareser nebûye û mexdûrên erdhejê yên Wanê di nava pirsgirêkên mezin de dijîn. Di encamnameyê de hate gotin ku li gel piratîkên Tirkiyeyê yên erdhejê hene jî dîsa ders dernexistiye û li hemberî vê yekê sersarî kiriye û detbîr negirtine. KCD, anî ziman ku li gel hêzên navneteweyî di roja ewil de alîkarî şand jî Tirkiyeyê alîkariya derve asteng kir û ev yek bû sedema mirinên zêde û mexdûryeta zêde. 

‘Tê xwestin wan bê valakirin’

KCD’ê bilêv kir ku pêdiviyên gel qet nayên çareserkirin û hikûmeta AKP’ê bi vê erdhejê di bin enqazê de maye. KCD’ê, destîşan kir ku ji ber pêdiviyên gel bi cih nehatine gel bertek nîşanî rayedaran dane û ev bertekên wan ên rewa ji aliyê polîsan ve bi şîdet û lêdanê hatiye bersivandin. KCD’ê, bang li Wezîrê Karên Hundir û Waliyê Wanê kir û xwest ji ber ku erk û peyvira xwe bi cih neane îstîfa bikin. KCD’ê, destnîşan kir ku rayedarên dewletê ji bo ku Wan bê valakirin destê alîkariyê dirêjî gel nake û kesên alîkariyê dikin jî asteng dikin. KCD, bilêv kir ku Wezareta Karê Hundir û Walîtî li şûna ku pirsgirêka gel çareser bike bêtir gel dixe nava mexdûriyetê û pirsgirêk û daxwazên gel paşguh dike. KCD’ê da zanîn ku hate dîtin ku ji bo alîkariyê kordînasyonek xurt nehatiye avakirin û vê yekê bêtir welatî mexdûr kirine. 


Bikaranîna çekên  kimyevî...

Di daxuyaniyê de hate gotin ku di 9 salan de AKP’ê pirsgirêkên civakê aniye rojevê, di nava bendewariyeke de hiştiye, çareser nekiriye û taluq kiriye. Di daxuyaniyê de wiha hate gotin: “Pirsgirêka herî bingehîn a Tirkiyeyê pirsgirêka Kurd e û di vê mijarê de jî bûye xwedî heman polîtîkayê, di polîtîkayên ku hatine ceribandin lê encam negirtine bi kar aniye û operasyonên siyasî û leşkerî bi dawî nebûye û êşên me zêde bûne. Herî dawî li navçeya Çelê ya Colemêrgê di operasyona leşkerî de li geliyê Tiyarê 36 gerîlayên HPG’ê jiyana xwe hatine qetilkirin. Cenaze şewitîne û ji aliyê malbatan ve nahetine naskirin, ev yek jî nîşan dide ku çekên kîmyewî hatine bikaranîn. Bikaranîna çekên kîmyewî yên ku derveyî peymanên navneteweyî, mafên mirovan û nirxên exlaqî û hiqûqî ye tu caran nayê qebûlkirin. Divê hemû kesên ku ji xwe re dibêjin ez mirov im jî vê yekê qebûl neke. Ji bo ku ev tiştên ku diqewimin bi her awayî bên ronîkirin saziyên mafên mirovan divê bikevin dewreyê berpirsyariyên xwe bi cih bînin.”


‘Dê xwedîlêderketina cenazeyan bidome’

Di daxuyaniyê de hate gotin ku sekinandina cenazeyan li morga Meletiyê û nedayina malbatan pêkanîneke antî-demokratîk û derveyî hiqûqê ye û wiha hate berdewamkirin: “Li gel hemû pêkutî û astengiyan gelê Kurd xwedî li cenazeyên zarokên xwe derketine û dê îro şunde jî xwedî derkeve.”

‘Tecrîd pevçûnan kur dike’

Di daxuyaniyê de bal hate kişandin li ser astengkirina hevdîtinên Rêberê PKK’ê Abdullah Ocalan jî wiha hate gotin: “Yek ji cihên ku pêkanînên antîdemokratîk tên jiyîn jî Girtîgeha Îmraliyê ye. Tecrîda li ser Birêz Ocalan a ku di çareseriya pirsgirêka Kurd de aktoreke girîng e bi mehan e didome pevçûn û neçareseriyê kur dike. Divê tecrîda li Îmraliyê bê rakirin û pêvajoya muzakereyê jinûve bê destpêkirin.”

Di daxuyaniyê de der barê xebatên makeqanûna nû de jî wiha hate gotin: “Di çareseriya pirsgirêka Kurd de riyek jî makeqanûneke demoratîk, azadîxwaz û beşdar e. Makeqanûna heyî ya ku encama 12’ê Îlonê ye pêdiviyên civakî bi cih nayne û ev yek ji aliyê hemû kesan vê tê ser ziman û tê qebûlkirin. Ji bo ku civak ji vê makeqanûnê bê xilaskirin û makeqanûneke hemdem bê amadekerin de jî AKP baweriyê nade. Ji bo ku bawerî bi AKP’ê bê ev makeqanûn bê rakirin û ji bo ku makeqanûneke nû çi pêwîst be bê kirin. Meclîsa me ya Domdar ji bo ku bi aweyeke xurt beşdarî pêvajoyya makeqanûnî, siyasî, civakî û demokratik bibe di nava xwe de nîşa kiriye û ji bo ku kêmasî ji holê bê rakirin biryara xebat û hewldana hevpar daye.”

DÎHA/AMED