Şairê navdar ê Soraniyê Şêrko Bêkes piştî darvekirina Elemhulî û hevalên wê, şiirek li serê nivîsîbû. Serkan Birûsk jî ev helbesta hanê wergerandibû Kurmanciyê. Li jêr em beşekê ji vê helbestê bi we re parve dikin:

… Ma sêdaredaran karî Çiyayê Şaho bitirsînin?

Ma karîn golên Wan û Urmiyeyê bêdeng bikin?

Ma karîn çokê Pîremegrûnê bitewînin?

Ew tiştên ku heta niha sêdaredaran karîye, wan kiriye…

Timî berevajiya wê pêk hatiye: Karwanê me dirêjtir bûye…

Dengê me zelaltir û girseyiya me gelektir bûye!

Sêdaredar tirsiyane… Ji kurd tirsiyane…

Sêdaredar reviyan û em her man.

Komara Sêdaredanan a Îslamî ya Îranê pîr pîr bûye

Lê baweriya me her germ e…

…

Ji serê sibehê ve… Kolana herî mezin a Sine

bû bi Ferzadê Kemanger…

Ji serê vê sibehê de … Mestirîn bexçeyê Mehabadê bû bi Şîrîna Elemhulî…

Di zeraqa serê vê sibehê de… Hemû ew zarokên ji dayik bûne

Navê Ferhadê Wekîlî li wan hatiye kirin!

…

De fermo Sine li sêdarê bidin?!

Serê Mehabadê bibirin…

De fermo nehêlin zarokên me ji dayik bibin!?

De fermo

Nehêlin baran bibare û mehêlin giya şîn bibe û

Nehêlin zevî bijîn!

Ez ji îro û pê ve, evîndarê çavê Şîrîn Elemhulî me

Ji îro û pê ve çi helbestên min hene, ez ê wan bikim bi

Gula stranan ji bo bejna Şîrîn Elemhulî…

Ji niha û pê ve ez tayek ji porê wê me…

Ji niha û pê ve

Ez neynûka tiliya wê me…

Ji niha û pê ve ez dibim ew cote pêlavên

Ku cara dawî xistibû piyên xwe û pê çû sêdarê û

Ji niha û pê ve, ez ew bazinê bi cî mayî yê destê

Şîrîna Elemhulî me…

Komara Îslamî ya sêdaran

Çi li sêdareyan neda, ji xewnê heta helbestê û

Ji helbestê hata jinê û ji jinê heta nan,

av û gul û kaniyan

Ya ku

Komara Îslamî ya sêdaran

nikare bi ti awayî li sêdarê bide

Ayinde û azadî ye…