Fermandariya Yekineyên Berxwedana Şengalê (YBŞ) bi daxuyaniyeke da zanîn ku şervanê wan ê bi navê Çekdar Sema (Farûk Xele Xwedêda) li Efrînê di Berxwedana Serdemê de şehîd bûye. YBŞ´ê di daxuyaniya xwe de diyar kir ku hevreyê wan Çekdar Sema bi dil û can beşdarî Berxwedana Efrînê bûye û 3´ê Adarê heta dilopa xwîna xwe ya dawî li dijî dagikerên Tirk şer kiriye û şehîd bûye. Daxuyaniya YBŞ´ê bi vî rengî ye: “Li Şengalê li hemberî çeteyên DAIŞ´ê û hevkarên wan yên hov, heval Çekdar di asta fermandariyê de bi rola xwe rabû û ji bo derxistina çeteyan ji herêmê di hemû hemleyan de cih girt û tecrûbeyeke mezin bi dest xist. Gava dewleta Tirk a dagirker û çeteyên wê êriş birin ser Efrînê, heval Çekdar bi awayekî dildarî, tevlî Berxwedana Serdemê bû.” Soza bilindkirina têkoşînê YBŞ´ê di daxuyaniya xwe de got heval Çekdar, yek ji lawikê gelê wan ê Êzîdî yê ku qehremanên mezin afirandine û wiha bi dawî kir: “Em ê ala berxwedanê ya ku me ji şehîdên xwe dewr girtiye, heta dawî bilindtir bikin û soza bilindkirina têkoşînê dikin.” Nasnameya şehîd Li gorî daxuyaniya Fermandariya YBŞ’ê nasnameya şehîd wisa ye: Nasnav: Çekdar Sema Nav û paşnav: Faruk Xelef Xwedêda Cih û dema jidayîkbûnê: Şengal / 1994 Cih û dema  Şehadetê: Efrîn / 03’ê Adara 2018’an ANF/ŞENGAL