Mala Jinê ya Kardelen ku di bin banê Şaredariya Baglarê de xebatên xwe dimeşîne ji bo 20 jinan pola asta yekemîn ya kursa Kurdî da destpêkirin û jinan bi serkeftî kurs temam kirin. Kursiyer Şukran Ateş ku sertîfîkaya kursa ziman ya asta yekemîn wergirt diyar kir ku salên borî koçî Stenbolê kirine û piştî ku vegeriya Amedê bêtir girîngiya ziman fêmkiriye û wiha got: "Li vir hemû kes Kurdî diaxive, ji ber ku ez Kurdî baş nizanim neçar dimam tirkî biaxivim û min zehmetî dikişand. Ez li Stenbolê mezin bûm. Me nekaribû li metropolan bi rihetî zimanê xwe biaxivin. Ez wekî buk hatim Amedê. Piştre ez hîn bûm ku li Mala Jinê ya Kardelen perwerdehiya Kurdî tê dayîn û ji bo kursa ziman qeyda xwe çêkir. Ez li vir gelek tiştan hînbûm. Di serî de ziman, çand û dîroka xwe hînbûm."Ateş bangî hemû jinan kir ku bila werin kursa ziman û Kurdiya xwe pêşbixin. 


Xwendin û nivîsandina xwe pêşxist
Yek jî jê kursiyeran Rûken Guneş anî ziman ku her çiqas di axaftinê de zehmetî nekişîne jî di nivîsandin û xwendinê de gelek zehmetî dikişand û wiha got: "Her çiqas Kurdî zanibim jî nivîsandin û xwendina min nebû. Bi riya wê kursê niha ez hem dikarim binivîsînim û hem jî dikarim bixwînim. Li vir cihekî pir xweş e, li vir parvekirinê hîn bûm. Me niha di asta yekemîn de kursa ziman dît. Piştre em ê derbasî asta duyemîn bibin. Ji ber vê yekê ez pir kêfxweş im."
Kursiyer Necla Avci anî ziman ku demên borî jî li Mala Jinê ya Kardelen perwerdehiya kompîtir û muhasebeyê dîtibû û ji ber ku zimanê xwe yê zikmakî baş nizanibû tevli kursa ziman bûye û wiha got: "Ji ber ku bi zimanê xwe yê zikmakî dinivîsinim, dixwînim û diaxivim pir kêfxweş im. Ji ber ku derfeteke wiha dane me, ez spasiyên xwe ji Mala Jinê ya Kardelenê re dikim." 

DÎHA/AMED