Xeylê hepsîyêy nêweş ke sîndorê mergî de yî bi nameyê derman kerdişî de ya yenîy surginkerdiş an zî dermankerdişê înan yeno taloqkerdiş.
Hepsîyê nêweş a bi nameyê Yilmaz Kahraman zî semeda ke mezgê ci de rîşe esto persgirêka vînayîşî cuyeno û nîno dermankerdiş, bin nameyê dermankerdişî de ame surginkerdiş û bi no hawa terkî mergî ame kerdiş. Kahraman ke tena serê xo nêşkeno bimano û biryara Fakulteya Tibî ya Kirikkaleyî ke vana ‘lazim o bi lezgînî bêro emelîyatkerdiş’ zî no 6 aşmî yo ke nîno emelîyatkerdiş.
Sewqî ci kerdî
Hewldayîşê keye û TUHAD-FEDÎ ra dima na ray zî bi mehneya cîhazêy emelîyatî xirab bîy, emelîyata Kahramanî yeno taloqkerdiş. Kahraman tewr peynî semeda emelîyatî Zindana Tîpa F a Humara 1’in a Sîncanî ra amebi surginkerdiş û tîya de ci dekerdîy hucreyê yew kesî.
Kahraman ke çimê ci weş nêveynenî zî waştişê ci û pawitoxê ci ke semeda Zîndana Tîpa F a Humara 2’in bêro sewqkerdiş zî nêame qebulkerdiş. Kahraman wexto ke vecyêno revîr encax bi tepiştişê dîwaran eşkeno bimeşo. Tewr peynî semeda ke bîşêrîy Tiba Edlî sewqî Zîndana Metrîsî amebi kerdiş.
Wezaretê edaletî
Rayîrberêe TUHAD-FEDî ya Enqereyî Mehmet Baytekîn derheqê babetî de dîyar kerd ke hewldayîşî înan bê encam mendo û wina vat: “Ma wekîlan reyde qalî kerd, înan zî Wezaretê Edaletî reyde qalî kerd.
Xora semeda ke Tiba Edlî hetgir têgêrena hepsîyan veranêdana. Înfazan taloq kena. Hetê nînan de 3-4 hebîy hepsîyê ke nêweşanîya giran înan reyde esta zî yenîy surginkerdiş. Pawitoxê Kahramanî dozger û Wezareta Edaletî rey zî qalî kerd, la ti encam heta nika nêame girewtiş. Rewşa ci zaf krîtîk o.”
Baytekîn tewr peynî ard ziwan ke nika vanîy ke do qawişê hepsîyan a Nêweşxaneya Nûmuneyî bêro temîrkerdiş la no zî nêzdîyê 6 aşmî dom keno.
No semed ra do nêweşî nêrî emelîyatkerdiş.
DÎHA/ENQERE