Endama Koordînasyone KJKyî Besê Erzîncane bale ante rolê stratejîkî yê Kurdan ser û wina va: “Kurdî biorganîze yî, wayîrê îdeolojî, rayberîye û serkêşîye yî. Gama ke nê hetî ra bêro ercnayene, do bêro dîyayene ke kam zaf Kurdan dir îttîfaq bikero, o het do qezenc bikero.”
Endama Koordînasyonê KJKyî Besê Erzîncane beşdarê programê televîzyonî bîye û derheqê çîyê ke rojeve de yî de qisey kerd. Erzîncane daye zanayene ke binkewtişê AKPyî weçînitişê Stenbolî de seba hêzanê demokrasîyî sebebê kêfweşî yo û halêko pozîtîf o û va ‘na netîce heman wextî de AKP-MHP lerzna’.
Erzîncane bale ante rolê pîlî yê weçînitişan ser û wina va: “Weçînitoxanê Kurdan rolêko stratejîk bica ard. Hem hetê nufûsî ra hem zî hetê cimatkî-ekonomî-sosyalî ra Stenbol bajarêko stratejîk o. Bajarêk de bi nê hawayî şuxulnayîşê rayanê hêzanê demokrasîyî û azadîye yê vera faşîzmê AKP-MHPyî de û netîceyo ke vejîyayo werte, seba demokrasîyê Tirkîya, seba problemê Kurdan xeylî muhîm o. Naye derbêka girane daya faşîzmê AKP û MHPyî ro.”
Erzîncane va ‘Kurdî Tirkîya de wayîrê vengêkê stratejîkî yî’ û wina domnaye: “Kurdî biorganîze yî, wayîrê îdeolojî, rayberîye û serkêşîye yî. Loma têkoşîn dano û xover dano. Gama ke nê hetî ra bêro ercnayene, do bêro dîyayene ke kam zaf Kurdan dir îttîfaq bikero, o het do qezenc bikero. Serkewtişê Îmamoglûyî bi nê hawayî yo. Ganî bêro zanayene peymeyê ‘Kurdî bê Tirkan nêbenê, Tirkî bê Kurdan nêbenê’ yo ke Rayberê ma eşt werte, na çarçewa de yo. Bi yewîya şaran aştî eşkena bi ser bikewo. Xeylî muhîm o ke îttîfaqê demokrasî bêro xurtkerdene. Hal û atmosfero ke Stenbol de vejîya werte, ganî seba Tirkîya bêro şuxulnayene. Binge û avantajêko xeylî muhîm vejîya werte.”
‘Çîyo muhîm têkoşînê ma yo’
Erzîncane dîyar kerde ke rejîmê AKP û MHPyî bi weçînitişanê Stenbolî derbeyêka pîle werde û wina va: “Ganî no îttîfaqo faşîst fam bikero ke bi hêrişan ne zereyê Tirkîya de û ne zî Rojhelato Mîyanên de nêeşkeno bibo hêz. Îttîfaqo faşîst bîyo zihîf. Beno ke biwazo polîtîkayanê xo yê verê, hêrişanê xo vera Rojawan, Xakurkê û vera hêzanê demokratîkan ê Tirkîya de bidomno. Meşrûtîyetê ci nêmendo. Tirkîyayijan zî weçînitişê Stenbolî de na yewe dîye. Hêzanê mîyanneteweyîyan zî dî. Çende biwazo polîtîkayanê xo yê hêrişkarîye bidomno do hîna rew biqedîyo. Tîya de çîyo muhîm têkoşînê ma yo.”
PDK bi destê xo teslîmê dewleta Tirkî keno
Besê Erzîncane îşxalkarîya dewleta Tirkî ya Başûrê Kurdistanî û hemkarîya PDKyî ya bi dewleta Tirkî ke xeylî herêmî teslîmê leşkeranê Tirkî kerde ser o vindete û wina qedênaye: “Famkerdişê rastîya PDKyî zehmet o. Serra 1992î ra destkewteyî estê. Ûca de hukmato herêmî awan bîyo. Şansêko pîl bi dest fînabi. Wareyê mîyanneteweyîyî de zî ameyêne naskerdene. Nika PDK bi destê xo destkewteyan teslîmê dewleta Tirkî keno. Merdimî naye weş fam nêkenê. Hemverê Tirkîya de eşkayêne tewirêkê hîna biîradeyî ramotêne.”
ANF / BEHDÎNAN