Kam nêzan do vajo qey Qendil û Şengal keyeyê pîyê înan o. Di mintiqêya Şengalî de panc hezar êzîdî ameyî kiştiş. Hewt hezar cinîdayê êzîdî zî hameyî remnayîş. Gerilayanê PKKe tayîna erey bimendayê se, koyê Şengale de yew êzîdî do sax nêmendayê!
Madem Şengal keyeyê pîyî şima yo û PKK zî meymano se, şima çirê nêşîna şarê ma yê êzîdî bipawê? Rayna; çi garantîyê ci esto ke şima do nêyî ra tepa zî bieşkê şarê ma yê êzîdî bipawî. PKK Şengale ra vejîya dima ra temînatê nêbîyayîşî yew komkiştişo bîn esto gelo? Bêguman çinyo.
Dî rayîrberanê PDKe de qe rî zî çinyo! Zincîya merdimî nêveşo û di merdimî de şermîyayîş çînibo se, fekê ci ra vatenên ana veng û vala vejîyenê. Şima çi rew kerdi xo vîr ra ke gerillayanê PKKî namus û şerefê şima reyna! Gerîlayan ra nêbîyayîne, Hewlêr enka deste DAÎŞî de bi. PDK teyna Şengalî ra nêrema; Mexmûrî zi teynayî û bêyî ke bieewnê pêynîya xo remayî. Hewlêr, qaşo payîtextê înan bî, yew seati mîyanî de nîmeyê ci tal û veng bî.
Ganî PDK baş bîzano ke, şarê Hewlêrî tersê DAÎŞî verra nêremayî; şar qayîtê xo bi pêşmerge û PDK nêardê. Şar zanitênê ke PDK nêşeno înan bipawo. Çimkî, tarîxê PDKî tarîxê remayîş, komplo û bêbextîyan o! Çi rey tengay de mendo se remayo, şîyo! Sewata ameyox û azadîya şarî xoverrodayîş, leckerdiş û bedel dayîş di kîtabê PDKî de nênusîyeno.
Ruxmî nêyî şarê Vaşûrê Kurdistanî PKKî ra bawer keno. Eke gerîla paştîya ci de bo se zano ke çew nêşeno ci rê çîyên bikero. Çimkî PKK heyanî enka teyna qabê şarê xo ciwîyaya û yew rey zî şarê xo nêxapênaya. Sewata nêy zî senîn ke şarê vaşûr eşnawit gerîla di mintiqa Maxmûrî de çeteyan dayo vindarnayîş, tepa agêyrayî şaristanê xo. Êyî cayê xo de mendibî zî bayêdo rehet antî.
Heto bîn ra zî, PDK nêwazeno mîyanê şarê vaşûr û gerîlayan de yew temas avera şira! Dema ke şarê vaşûr gerîlayan ra hemhal benê, raşteya PDKî weşêr yeno famkerdiş. Yew het de mutewazîtêy, dilsozêy û fedakarêy; heto bîn de fekbazêy, şatafat, ruşwet û rant! Bîyîşê gerîlayan nê ferqan ca de vejeno raşteyî. Şar, her ke gerîla vîneno, girêdayîşê ci beno xorî û o bi o misqal zî PDKî ra beno dûrî.
Vatena “Gerîla îta de meyman o” enka weşêr yeno famkerdiş. No vaten qabê PKKî nêameyo vatiş! PDK zî zaf weş zano ke ê çendin qiseyanê ana bikerê zî PKK goş nêdano nê vatenan. No peyam, sewata şarê vaşûrî ameya dayîş. Wazenê şarê ma yo vaşûrî ra vajê ke “paştîya xo bi gerîlayan ra hentay germ mekerê. Gerîla îta de meyman o; ewro esto meşte çinyo. Şima çîyek çewt bikerê se, wexto ke gerîla şêro dima ra ma do hesabê ci bipersê!” O vaten çeku bi çeku yeno no mane.La bele; wa PDK zî nêyî weş bizano ke, gerîla wayîrê çar leteyê Kurdistanî yo. Eke yew meyman esto se, o zî PDK bi xo yo. Tersî verra nê çîyan vanê la fayda tersî mergî ra çinyo…
Wazenîy herkes bibo koleyê înan
Pekî PDK çirê estbîyayîşê gerîlayan ra nêrehet bena? Çirê xoserîya Êzîdîyan nêwazena? Ma zanê ke di vaşûrê Kurdistanî de PKK, PDK rey de nêkewto lecêde desthilatdarêy mîyanî. Mezgê PKKî de dewletperestey çina. Qabê cay zî yew armancê ci ya desthilatdarêyî çinyo. PKK, PDKî rê vano ke: “Şengal wa reyna girêdayî şima bo, la wa xoser zî bo” PDK zî nêyî ra terseno. Ê vanê ke: “Wa hemeyê Kurdistanî bibê koleyê înan!” Yew xanedano feodal, yanê kêyeyê Barzanîyan, wazenê hukmê çar leteyê Kurdistanî bikerê. Hema bi mezgê seserra 19’an lebetîyenê. La paradigmaya Rayver Apoyî destur nêdano na mezgê kan rê.