Serekkomar Erdoganî wexto ke Hîndistanî ra agêrayêne cewab dabî persanê rojnamegeran û wina vatbî: “OHALî Tirkîya de se kerd? Gelo sermaye ra çîyêk berd, merdimî tesîr bîyî? Wexto ke ma 2002 de ameyî îqtîdar, OHAL estbî, la o wext cîya bî. Merdiman ma ra waşt ke ma ê OHALî wedarnî. Ma zî wextê serekîya Abdullah Begî de mîyanê aşmêk de wedarna. Labelê OHALo nikayîn seba awankerdişê huzirî yo. Eke OHAL nêbo ma nêşênî vera PKK û FETOyî de têkoşîn bidî. OHALê ma û yê Fransa yewbînan ra cîya yî; ewja de çend hedîseyî bîyî, cok ra OHAL ame îlankerdiş, labelê ma de terorî waşt ke dewlete xira bikero. Ma nêşênî seba zerrîya ti kesî weş bikerî, fek nê têkoşînî ra verabidî.”
Qiseykerdişê Erdoganî ke vatbî ‘ma OHAL karê merdiman destê înan ra girewt?’ ra nata, bîlançoyê OHALî her ke şono giran beno. Goreyê daneyê Wezîrîya Ewleyîya Sosyal û Xebate heta nika 150 hezar kesî ameyî îxraçkerdiş, 60 hezar kenî ameyî tewqîfkerdiş, derheqê 130 hezar kesan de zî tehqîqat dîyayo destpêkerdiş. Reyna goreyê daneyan heta nika 150 ra zêde dezgehê çapemenî ameyî padayîş, 168 rojnamegerî hepisxane de yî. Hûmara tewqîfkerdeyan 210 hezarî derbaz kerd û hema vaje heme şaredarîyanê DBPyî rê qayûmî tayîn bî.
Artêşa xo awan keno
Wekîlê Hemserekîye ya HDPyî Ahmet Yildirimî zî derheqê îzehetê Erdoganî de va ‘mabênê OHALan de kerdişê muqayeseyî, çîyêko şerm o’ û wina dewam kerdbî: “OHALo nikayîn OHALo verên ser de rehmet waneno. Merdimî bi veyşanî yenî terbîyekerdiş. Ewro Sûr, Cizîr, Gever û sewbîna cayan de dest ronîyeno milkê şarî ser de. Derheqê lastîkanê vewre de daxî qerarname yeno vetiş. Bi qerarnameyan 7 hezar bekçî gênî; seba girewtişê karî îmtîhanî çin î. Kamî yenî girewtiş; qoricî û ajanî yenî girewtiş. AKP bin nameyê OHALî de artêşa xo awan keno.”Yildirimî peynîya qiseykerdişê xo de muqayesekerdişê Erdoganî yê OHALê Firansa û yê Tirkîya zî rexne kerd û wina va: “Fransa de îxlalêko ke bibo babeta raporê dezgehanê mîyanneteweyîyan çin o. Labelê derheqê Tirkîya de raporê AGÎT, Miletê Yewbîyaye û Yewîya Ewropa estî. Labelê derheqê Fransa de çîyêko winasî çin o. Ganî ma xo nêxapênî.”
DÎHABER/ANQARA