Par bajarê Gurgumî de her çiqas ke zaf reaksîyon û çalakîyî virazîyaybî zî orteyê 16 dewanê elewîyan de kampêka bextwaştoxan yê 27 hezar kesî tede ca gênî, ameybî viraştiş. Na kampe nika bi îstîsmarê domanan, întîxar, fuhiş û mergê şikinan yena zanayîş.Wezîfedaro ke nêwaşt nameyê xo bido, derheqê çîyê ke kampe de yenî cuyayîş de qisey kerd.
Wezîfedarî va ‘kampe de domano ke 5 serreyî raştê îstîsmarî ame labelê nika aqûbetê ci nîno zanayîş’ û wina dewam kerd: “Hedîseyî ra dima dormeyê mektebî de têlî ameyî ronayîş. Seba ke serê qirêjîya zereyî bigîrî, ronayî. Reyna kampe mîyan de ame îdîakerdiş ke bi nameyê Îmmet Alîyo 10 serreyî întîxar kerdo. Seba întîxarî ma ra vatî ‘maya ci zewijîyaya, cok ra întîxar kerdo’ la domanêko 10 serreyî çîyêko winasî nêkeno..”
Bi zorî danî kerdiş
Wezîfedarî qala fihuşî kerd û wina va: “Saete 12ê şewe ra dima cinîyî seba ke fihuş bi înan bidî kerdiş, kampe ra yenî vetiş û benî keyeyanê rezî. Heto bîn ra şert û mercê kampe zaf xirab î. Keyeyêko 17 metrekare yo de 8 kesî manenî. Kampe seba 27 hezar kesan a, labelê nika ra hûmare 40 hezarî derbaz kerda. Sereyê merdimî 100 lîra pere danî.”Wezîfedarî tewr peynî va kampe de tim boyêka xirabe esta û qedêna: “Mîyanê roje de 3 reyî kapaxê kanalî yenî akerdiş. Boyêka winasî ya ke merdim nêşêno deyax bikero. Nê merdimî her roje raştê aye boye yenî.”
DÎHABER/GURGUM