Gûreyînê newe ra înşakerdişî ke Komeleya Paştdayenê Rojawa Gever de da destpa kerdiş ramenê. Îdarekara Komelî ra Fîdan Kanlibaş da zonayen ke çarçoveyê kampanya de Sîlopya, Hezex û Sûr de 4500 malbatan çarçoveyê kampanya de resnay pê. Kanlibaş vist vîrî ke kampanya vêşêr Awrûpa û sûkanê Tirkîye ser de vila bî.
Gever de 510 ‘malbatê waûbirayî’
Fîdan Kanlibaş ke vengê herakerdişê kampanya vist vîrî ke Gever de 10 hezarî ra vêşî keyeyê ke rijîyayê û veşnayê estê. Kanlibaş aşkere kerd ke rojanê vernî de seba Nisêbîn û Şirnex zî kampanya destpa kena û wina va: “3-4 malbatî êşkenê quwetê xo bikerê jew û malbatekê bigîrê ser xo. Kampanya herzewbîn eleqeyê manevî zî kena xûrt. Meqsedê ma tenya paştdayişê maddî nîyo. Xeberan ra goştarîkerdiş, ser înternet ra taqîpkerdiş cîya yo, la şahîdan ra goştarîkerdiş cîya yo. No paştdayen malbatanê tîya de hîsê ‘tenya nîyê’ akeno. Nayî ra destegê maddî ra pîya, destegê manevî zî erja yo.”
Linga Tirkîye û Kurdistan
Îdarekara Komeleya Paştdayenê Rojawa Fîdan Kanlibaş vist vîrî ke iyê dê linga Tirkîye û Kurdistan yê kampanya hera bikerê û wina va: “Ma na kampanya Awrûpa de ser kesê hestîyar da destpa kerdiş. La ganî linga cîya Awrûpa û Tirkîye hera bibo. Wextê vernî de ma dê Tirkîye û Kurdistan de zî kampanya bidê ramitiş.
Serva Şirnex zî kampanya dewam kena, la serva Nisêbîn zî gureyînî dê bîrê destpa kerden.
DÎHA/COLEMERG