Çend rojî verê vejîyabî orte ke Taxa Terolarî ya Gurgumî de Kampa AFADî de doman û cinîyê sûrîyeyijî raştê îstîsmar û fihuşî yenî. Reyna eynî çîyî kampê AFADî ke qezayê Nîzîp û Islahîyê yê Dîlokî de zî vejîyaybî orte. Babete ser o Endama Komîsyonê Bextwaştox û Koçberan yê HDPyî Gulsum Agaogluye qisey kerde.
Agaogluye va ‘taxa Terolarî de tena cayêkê merge estbî, o zî kerdî kampa bextwaştoxan’ û wina dewam kerde: “Badê ke kampe ameye viraştiş, merdiman taxe teriknayî. Nê polîtîkayî şaş î; cayê ke ameyî vengkerdiş de tirkmen û selefîyî ameyî bicakerdiş.”
Kontrolê înan çin o
Agaogluye bale ante xebera îstîsmar û fihuşê ke vejîyaybî orte ser û va: “Terolar tena nimûne ya; kampê bextwaştoxan kontrolê kamî de yî dîyar nîyo. ”
Agaogluye peynîya qiseykerdişê xo de qala cinîya bi nameyê Emanîya sûrîyeyija ke Sakarya de raştê tecawizî ameybî û dima ra ameybî qetilkerdiş kerde û wina va: “Hêrişê nîjadperestî ke vera bextwaştoxan de benîy, her ke şono zêde benî. ”