Rojava de Kantonê Cizîre 1 roze konferansê 2îne yê Cenevre ra avê îdarê xo yê xoseriya demokratîk îlan kerd. Kantonê Cizîre 21ê asma çile ra na het endî jû raştiye ya. Îlanê xoseriya demokratîk yê Cizîre mavênê netevan de çiqas yeno naskerdene, no persode bîn o.

Konferansê Cenevre yê 2îne suka Îsvîçre Montreux de 22ê çile dest kerd ci. Seke hemserokê PYD Salîh Muslim vat “konferans de şaranê Suriye ra qederî herkes” yeno temsîl kerdene. Partiya en girse û wayîrê quwete, PYD, na konferans nêceriye. Yanî kurdî na konferans de nînê temsîl kerdene. Seke Kurdîstan herbê dîna yê 2îne ra dime wertê 4 dugelan de hetê emperyalîstan ra ame bare kerdene, ewro emperyalîstî onca lewê Tirkiye û Suriye de ca cenê.Tirkiye ver ra na het nêwazena kurdê Rojavayî serbest bê.
Mordemîke niyada, kam na konferans de ca ceno, vîneno ke dîna verva kurdan biya jû. Amerîka û Rusya ra bije hata Koreya Başur herkes tewrê na konferansî beno. Mordem îta de xora pers keno, aceba tarîx onca dibare beno? Kurdî Lozan nêceriyayî, Mahabad de teyna verdiyayî. Konferansê Cenevre yê 2îne  roza  ronayena Komara Mahabad de dest kerd ci û nunerê kurdan nêceriyayî konferans.
 Bi na hal zî tabî meselê Suriye halnêbenê, hebena kunê têwerte. Çike nunerê qoman tevera verdînê. O waxt nî şarî zî raya xora sonê. Kurdan jû roze destcikerdena konferansî ra avê, yanî 21ê asma çile, Kantonê Cizîre de xoseriya demokratîk îlan kerde. Belka onca tayê vanê “hona rew o, ça honde lerze kenê.”
Nî mordemêke niya pers kenê, siyasetê dîna ra famnêkenê. Kurdî xeyle lawatiyayî ke na konferans de ca bijerê. Kurdan pît ke hometa bêbexte reye zî înan bivîno. La hometa dîna biye kerr, lal, kor û kurdî onca nêdî. Pêro dugelêke nika konferansê Cenevre yê 2îne de ca cenê, demokrasî, heqanê mordemî û yê kemiyan ra qesey kenê, heqanê kurdan nasnêkenê. Yanî pîtene kurdan rê feyda nêardenê. Eke dugelê emperyalîstî û xizmetkarê înan ewro amade niyê, Xoseriya kurdan nasnêkenê, meste zî nêkenê, bêro zî kamiya kurdan, heqanê kurdan nasnêkenê. Binê nî şertan de kurdan herhalde Godot nêpîtenê.
Na rîwal ra rindke Kantonê Cizîre de xoseriya demokratîk îlan biye. Pêro qomî Kantonê Cizîre de yenê  nuner kerdene û hukumat de ca cenê. Marê zî teyna bimbarek kerdene û Kantonê Cizîre rê wayîr vejiyayene manena.