Hemsereka Kantonê Kobanê Ayşe Efendîye derheqê xebatê komun û meclîsî ke Kobanê de estî de qisey kerde û vist vîrî ke înan heta nika 450 komunî awan kerdî û dê bi nê komunan xo bi xo îdare bikerî.”
Kantonê Kobanê yê Rojawanî de hetê hemleyanê leşkerî de bingeyê şorişî zî yeno awankerdiş. Seba nêyî zî awankerdişê komun û meclîsan zî bi hawayo leze domîyeno. Heta nika pêroyîya Kobanê de 450 komunî û 6 komîteyî ameyî awankerdiş. Hemsereka Tevgerê Demokratîke (TEV-DEM) yê Kantonê Kobanê yê Rojawanî Ayşe Efendîye qisey kerde.
450 komunî
Efendîye va ‘Şarê Rojawanî yew merhaleyo newe ra derbaz beno’ û qiseykerdişê xo wina domnaye: “Ma goreyê qezencê xo yê leşkerî hereket kenî. Her çiqas ke kêmanîyê ma bibî zî ma xebatanê xo domnenî. Seba ke şer estbî ma xebatê xo yê awankerdişê meclîs û komunan zêde nêşîna bikerî. Tena ma seba lazimîyanê xo yê heyatî xebate kerde. Heta nika ma pêroyîya Kobanê de 450 komunî û 6 komîteyî awan kerdî. Nê komîteyî zî hetê perwerde, pawitiş, weşî, sulh, xizmet û ekonomîye de yî.”Efendîye dewamê qiseykerdişê xo de va ‘Nê komîteyî do mîyanê meclîsan de ca bigîrî’ û qiseykerdişê xo rê wina dewam kerde: “Temsîlkarê komîteyan û hemserekê meclîsan do bêrî weçînayîş. Kobanê de 14 taxê ma estî. Ma hedef kenî ke 12 meclîsan awan bikerî. Sîstemê ma sey sîstemê dewlete ke cor de maseno û cêr de teng beno nîyo; tam çepê ci de sîstemê ma cêr de hîra beno û cor de teng beno.”
Nêbo nêbeno
Efendîye va ‘do xebatê ma dewam bikerî’ û qiseykerdişê xo wina qedênaye: “Mamosta, muhendîs, doktor û avûkatê ke kanton de yî, do meclîsan de ca bigîrî. Do goreyê lazimîyan komunî bêrî awankerdiş. Wexto ke komunî çinêbî, merdim nêşkeno çîyêk bikero. Nê semedî ra ganî merdim bibo endamê komunêk. Do malzemeyê zexîre zî tede heme lazimîyî do hetê komunan ra bêrî dayîş.”
DÎHABER / KOBANÊ