Endam û îdarekarê sendîkayê Amedî zî derheqê 1ê Gulane Roja Roşanê Karkeran de qisey kerdî û fikrê xo nîşan dayî.
Verfekê Platformê KESKî yê Şûbeya Amedî Uzeyîr Evrenkî va ‘2015 ra nata welat de rojê îstîsnayî estî’ û wina domna: “Tim cografyaya ma de şer, pêrodayîş, merg û qetlîamî virazîyenî. Karkerî kar ra ameyî eştiş. Ma veng danî heme karker û kedkaran ke bi ruhê Newroza Amedî û 16ê Nîsane biherikî rasteyê 1ê Gulane. Ma do vera heme kerdişan de reaksîyon nîşan bidî û vajî Nê.”
Wa heme beşdar bibî
Endamê Koordînasyonê Heyetê Bajarî yê TMMOBî yê Şûbeya Amedî Mehmet Orakî zî bale ant muhîmîya 1ê Gulane ser û wina va: “Ganî heme karker û kedkarî pîya îxraçkerdişan ra vajî êdî bes o. Ganî ma bi hawayo xurt vera cînayetê karî de bivinderî. Hetê karker û kedkaran de ganî şarê ma zî piştî bido. Ez veng dana heme muhendîs, mîmar û sewbîna kena, wa beşdarê mîtîngî bibî.”
Hemsereka Egîtîm Senî ya Şûbeya 1. ya Amedî Hatîce Efeye zî wina va: “Bi KHKyan tewr zaf cinîyan kar ra dûrî kerdî; cok ra no têkoşîn seba cinîyan muhîm o. Ganî ma bi ruhê 8ê adare biherikî rasteyan. Lazim o heme hetê komelî beşdarê mîtînga 1ê Gulane bibî. Ma do bi veng, reng û sloganê xo rasteyan de bibî. Waştişê ma o yo ke wa OHAL biqedîyo û KHKyî bêrî vindarnayîş. Ganî tena karmendî nê, heme karkerî bêrî na roje pîroz bikerî.”
DÎHABER/AMED