MEDÎNE MAMEDOGLU / JINNEWS / MÊRDÎN
Hindî yan zî zebeşe herême de tewr zaf Amed de dima ra zî Mêrdîn de resena. Emser seba ke aşma Nîsane de varan zaf vara, karitişê hindîyan tay erey ameyo kerdene, coka do aşma Êlûle de xesadê ci bêro viraştene.
Cinîyan ra Fatma Akaya ke bi serran o hêgayan mîyan de xebetîyena, dîyar kerde ke emser varanî ver tay erey ameyo karitene û wina domnaye: “Ma bi rojan o ke bostananê hindî û beşîleyan de çape kenî. Ma 20 cinîyî no bostan de xebetîyenî. Ma serê sibayî saete 5.00 de yenî û mîyanê roje saete 13.00 de qedênenî. Cinîyî heqê keda xo gênî. Nê hindîyê keyeyî yî. Wexto ke çape kerdene qedîya, ma dest bi awedayîşî kenî. Herçiqas ke nameyê tîya zaf nêro zanayene zî, merdimê tîyayî zî zaf hindî û beşîleyan resnenî. Ma nîmeyê berardişî roşenî, nîmeyê ci zî xo rê hewanenî. Sey her karî no kar de zî tewr zaf keda cinîyan esta. Karê ma de zî heme çî hetê cinîyan ra yeno kerdene. Eke çape nêbo berî weş nêresenî, heme rizîyenî. Tîya de bêxera xeleyî, heme çî de keda cinîyan esta.”