MELÎKE CEYHAN / MA / STENBOL
Bi nameyê Vefa Kartalî de hepsîyo ke Zîndanê Tîpa Fyî yê Hûmare 1yî yê Tekîrdagî de maneno, seba ke tedawîya ci nîno kerdene û bale bianco rewşa hepsîyanê nêweşan ser, 79 rojî yo ke rojeyê mergî de yo. Xeylê nêweşîyê Kartalî estî û hucreyê yew kesî de yeno tepiştene.
Kartal 24 serrî yo zîndan de yo û nêweşîyê loqle, mezg, qelb, mîde û sewbîna xeylê nêweşîyê bînî ci de estî. Birayî Kartalî Umut Kartalî qisey kerd. Birayî va ‘birayê mi verê cû Zîndanê Kiriklarî de mendêne û ewja de zî nêameyêne tedawî kerdene’ û wina domna: “Raporê ci yê MRyî bi hawayo qestî ame vînî kerdene. Birayê mi seba tedawîye waştişname dayo, labelê ci berdî Dozgerîya Komare. Ewja de waştişname nîşanê ci dayî û çimê ci ver hemînan dirnayî û ey berdî Zîndanê Tekîrdagî.”
Bira Kartalî wina dewam kerd: “Birayê mi seba ke kel-melanê xo bigîro, 100 rojî kewto girev û kel-melê xo girewtî. Ma tewr peynî 12ê êlule de qisey kerd û mi ra va ‘ez do bi rûmetê xo bimira’. Tewr peynî nêşêna bêro telefon de qisey bikero. Moralê birayê mi ca de yo, labelê rewşa ci baş nîya. Mudaxale qebul nêkeno. Ma wazenî ke wa tedawîya ci bêra kerdene. No xoverdayîşêko şexsî nîyo. Ganî zîndanan ra yewna cenaze nêvejîyo. Waştişê ma no yo.”