Goreyê qaydeyê standardîzekerdişê kirmanckî
Nê kartî goreyê qaydeyê standardîzekerdişê ziwanê kirmanckî yê Grûba Xebate ya Vateyî ameyê amadekerdene. Kartan de nêzdîyê hezar û şeş sey çekuyî û îfadeyî cagênê. Û reyna, Kartanê Ziwanî de alfabe, qaydeyê telafûzan, zanayîşê ziwanî yo bingeyên û kilavuzê qiseykerdişî zî bi şeklêko asanfamkerdiş cagirewto. Rîpelanê kartan de, rîyê verî de çekuyê tirkî û hetê pey de zî kirmanckî yê xo estê.
Kartê Ziwanî, seba ke zanayîşê çekuyan de merdim xo xurt bikero û ziwanê xo hîna aver de bêro ameyî amadekerdene.
Aydin Çîçek kam o?
Alî Aydin Çîçek 2003 ra nat Îstanbul de ciwîyeno. Gama ke dezgeyê UNESCOyî derheqê rewşa vindîbîyayîşê lehçeya zazakî /kirmackî de rapor vila keno, o zî keweno hereket. Enstîtuya Kurdî ya Îstanbulî û Weşanxaneyê Vateyî de verî derse cêno, dima o bi xo dersa ziwanî dano.
Hewldayenê Çîçek’î
Hîkaya ey a bi sernameyê “Xêx”î 2009 de musabeqaya hîkaye û şîîran a des û hewtine ya Huseyîn Çelebî de xelata dîyine girewte. Dima, musabeqaya fiqrayan ke keyepelê Zazakî.Netî organîze kerde, fiqraya ey a bi sernameyê “Şima Teskere Nêdanê, Dewlete Dana” xelata juyîne/yewine girewte. Reyna, 2010 de, musabeqaya hîkayan a Abdullah Duranî de hîkaya ey “Mar” xelata mansîyonî cêna. Û musabeqaya hîkaye û şîîran a des û heştine ya Huseyîn Çelebî de zî şîîra ey “Xatir” xelata juyîne/yewine girewte. Çîçek, reyî zî endamê jurî yê Xelata Edebîyatî ya Huseyîn Çelebî bî. Şîîr, nuşte û hîkayeyê ey Toplum ve Kuram Dergisi, kovara Vate, kovara Şewçila, Tîroj, Kovara W û rojnameya Newepelî û welat Verrojî de weşanîyayî.
Eserê ey ke weşanîyayê:
* Teberik (Hîkaye), Weşanxaneyê Vateyî, Îstanbul, 2010
* Sayê Marû (Estanikanê Xinis û Tekmanî), Weşanxaneyê Vateyî, Îstanbul, 2012
* Lêl (Hîkaye), Weşanxaneyê Vateyî, Îstanbul, 2014
* Kartê Ziwanî yê Kurdkî, Weşanxaneyê Vateyî, Îstanbul, 2016
DAÎMÎ DOGAN