Parlamenteranê HDP ra dima nika zî hemşaredarê DBP hedefê îxtidara AKP de yê. Badê hedef damûsnayişê Reîscûmhûrê Tirkîye Erdogan’î şaredarîyanê DBP yardimkarê Serokwezîr Mehmet Ozhasekî aşkere kerd ke iyê dê pêşnîyaz bikerê ke hemşaredarê DBP wezîre ra bîrê girewten û hurendîya ci de kayyûm bîrê eşten. Serokwezîr Bînalî Yildirim’î zî aşkere kerd ke ganî wezîfeyê hemşaredaran peyser bîrê girewten û va, na het de ma gamî eştî, ma dê heta peynî berê.
Amedijî vera hewldayenanê tesfîyekerdenê şaredarîyanê DBP bi hêrsî yê. Welatijan day zonayene ke iyê dê destdergîyê şaredarîyan rê destûr nêdê û aşkere kerdî ke memûrê ke bîrê eştiş zî dê qebûl nêkerê.
Ronişteyanê taxa Yenîşehîr yê Amedî ra Cemal Akin’î vist vîrî ke hikûmet pêrokîn qeraranê şarê kurd bi behaneyan kena deqede û va, hikûmeta ke şarê kurd, tercîx û qeraranê ci ra hurmet nêgîna ma dê zî qeraranê ci nêsilasnê.Qebûl nêkeme
Wendekarê zangehî Ramazan Akodûn’î zî da zonayene ke çiyo ke yeno kerden çinîhesibnayişê îradeyê şarî yo û va hewl danê ke goreyê jû qiseya merdeyo ke Enqera de yo dest ronê şaredarîyan ser. Akodûn’î aşkere kerd ke ê dê wezîfedarkerdişê memûrê ke hurendîya hemşaredarê ke bi se hezar reyan ameyê ser kar qebûl nêkerê.
Gurekarê înşeatî yê taxa Rezanî Mûammer Dûrgûn’î zî hayr ant babeda eştişê kayyûmî ser û wina va: “AKP bi zûrîyanê ‘poştdayenê rêxistin’ hewl dana ke şaredarîyê ke ebe raya weçîntayişî nêşa bigîro bi rayanê bêhiqûqîn dest rono ser. Bi nayî wazenê destkewtişanê kurdan pêropîya çinîbikerê. Êşkenê kayyûm berzê medya û şîrketan, la nêşkenê dest ronê îradeyê şarî ser. No hesan nîyo. Çi plan kenê se ganî desinde ci ra fek veradê.”
‘Şar reyna ra weçîneno’
Welatijo bi nameyê Kendal Kaçmaz’î zî vist vîrî ke demokrasîyan de kesê ke şar ano hikûm, encex şar êşkeno wezîfe ra bigîro û va ganî qerarê şarî ra hurmet bigîrê. Kaçmaz’î da zonayene ke eke hewldayenê winayîn bibê maneyê weçînayinan nêmaneno û va, şar do şaredarîyanê DBP fina biweçîno. Do sebo, reyna ra dest ronê? Mûrat Akçan’î zî aşkere kerd ke weçînayinanê verikîn ê dê fina reyanê xo bidê DBP û va: ‘Eke no zî bes nêkero rayê newî abenê. Nêşkenê qerarê şarê kurd çinî bihesibînê. No nîno qebûlkerden.
‘Kesê ke kiltûrê ma ra yê wazeme’
Qezaya Şirnex Cizîr a ke bin ablûqeya dewlet de ya de welatijan êrişanê vera şaredarî û gurekaranê ci rê nêzarîbiyen damûsnay. Qeza de karê şaredarî yenê manîkerden û gurekarê ci yenê binçimkerden. Cizîrijan bi vatenanê ‘Ma bi reyanê xo damûsna ke kamî weçîneme. Ma kesê ke dewlet ana qebûl nêkeme’ nêrazîbiyen damûsnay.
Cenîya bi nameyê Husna Çagdavûl aşkere kerd ke iyê dê kayyûmê ke hetê dewlet bîrê wezîfedarkerden nêsilasnê û wina va: “Ma wazenê ke kesê ke ma bi xo weçînayê şaredarîyanê ma de bigurweyê. Însanê ke ziwan û kiltûrê ma ra yê wazenê. Dewlet nêşkena merdimanê xo bîyaro û Cizîr de bigurweyîno. Dewleta ke keyeyanê ma rijna nika zî do dest rono şaredarîya ma? Ma keso ke dewlet bîyaro qebûl nêkenime. “
‘Ma zî dewlet nêsilasneme’
Cenîya Cizîrij Halîme Sancak zî da zonayene ke dewleta ke verra şarê kurd kayê leymin (qilêrîn) kaykena dûştê îradeyê şarî herb ramena. Sancak hewldayenê eştişê kayyûmî zî zey heqaret hesibna û wina va: “Dewlet însananê ma qetil kerd, keyeyanê ma rijnena. Nê besnêkenê nika zî yenê dest ronenê şaredarîyanê ma? Ma na nêheqî qebûl nêkenê. Eke dewlet ma nêsilasno, ma zî dewlet nêsilasnenê û nayî qebûl nêkenê.”
Nêşkenê îradeyê ma çinî bihesibnê
Cenîya 40 serrî Şahîya Dalmiş zî vist vîrî ke ê dê dûştê tewrê dewlet de vinderê û qerarê ci nêsilasnê. Dalmiş da zonayene ke ê dê çiyê ke dûştê parlementer û hemşaredaranê înan kenê qebûl nêkerê û qiseyê bi nê vatişan qedîna: “Dewlet jû hetî ra heqê destnêdayişanê parlementeranê ma wedarnena, heto bîn ra dest ronena şaredarîyanê ma ser. Kesê ke ma weçînay gênê bin çiman, tepişenê. Ma nayî qebûl nêkenê. Ma dê kesê ke hetê dewlet ardîyenê nêsilasnê. Dewlet nêşkena bi no şiklî îradeyê ma çinî bihesibno.”
Welatijo bi nameyê Rifat Dalmiş’î zî rixmo ke gureyînê şaredarî nêvindîyenê kerdenanê dewlet rê nêrazîbiyen damûsna û va, ma xîzmetanê şaredarîya xo ra qayil ê. Ma îradeyê xo weçîna û serkewtî. Ma dê dest dergîya dewlet ya dûştê şaredarîyanê xo nêsilasnê.
DÎHA/AMED/ŞIRNEX