***

Wexto ki vaten û kerden zey pê nêbo, se kenê biki. Wexto ki vaten zerî ra mebo, ha vaj ha vaj pere nêkeno. Bi mîlyonana nimûney estê. Nimûneyê peyin KCD û parlementerê HDP Kadrî Yildirim o.

***

Rojo dişeme, xebera kombiyayişê çapemenî ê KCDe amê. Vajiyayê ki parlementerê HDP Kadrî Yildirim’o derheqê heqê ziwanê may û perwerdeyê kurdî de, qisey bikiro. 

Mesele muhîm bî. Hem mijara kombiyaşî û hem zî nameyê Kadrî Yildirimî ser, kurdî ard vîrê ma xebatkaranê Sterk TVî. Ma hema hedreyin kerd.

***

Komîteyê Weşanî qerar girot, kombiyayişî zindî bido. Ma goreyê weşanê zindî xo kerd hedre. Kesî îhtimal nêda, ziwanê kombiyayişî tirkî bo. Heta jû embaz vati, ‘eki kurdî bo ma bidê’. 

***

Ez heme kewta maben û min vist vîrî ki, Kadrî Yildirim dir qisey bikiro. Heta min vat: ‘Herhel Kadrî Yildirim mewerzo meseleya ziwanê may û perwerdeyê kurdî sero, tirkî qisey mekiro’.

***

Nay ser kesî ra veng nêvejiya. Yanî heme embazî fikiriyayê Kadrî Yildirim kurdî qisey bikiro. La belê wexto ki, kombiyayişî dest kerd ci, ma pêro zey Konferansê xorayverîn ê DBP, şoq biyê. 

O Kadrî Yildirim o ki, bi xebatanê xo ê kurdî silasiyeno, bi tirkî dest bi qisanê xo kerd. Hem jî meseleya zey “heqê ziwanê may û perwerdeyê kurdî de”.

***

Bi ziwanê tirkî qalê muhîmînê ziwanê may kerd. Bi ziwanê tirkî qalê muhîmînê perwerdeyê kurdî kerd. Vist vîrî ki demê perwerdeyê serra 2015-2016 hefteyo bêro dest bikiro. Pey ra jî kurdistanijan ra wast ki, hefteyo siftayin de, qandê wastenê perwerdeyê bi ziwanê kurdî, mektebanê tirk boykot bikirê. 

Kotî ra biewnê şaşîna gird. Kotî ra biewnê xoveng vetin. Kotî ra biewnê eyb û şermê gird.

***

Eki Kadrî Yildirim kurdî qisey mekiro. Eki rayverê KCDe kurdî qisey mekirê. Eki rayverê DBP kurdî qisey mekirê. Eki ravyerê saziyê kurd kurdî qisey mekirê, kam bikiro? Eki wazenê dewijî kurdî qisey bikirê, dewijî xora kurdî qisey kenê. 

***

Verê heme çî lazimo, ê kesê qalê muhîmînê ziwanê kurdî kenê, ê bi xo goreyê vatenanê xo hereket bikirê. Lazimo ê kesê qalê muhîmînê perwerdeyê kurdî û mektebanê kurdî kenê, ê bi xo muhîmîn bide ê ziwanî û mekteban. 

Bi ziwanê serdestana xorayverîn jî nêbeno û xoserîn zî nêbeno. Raya xorayverîn zî û xoserîn jî, ziwanê serdestan ra nêravêrena. 


Memed DREWŞ