Hevserokê Konseyê Rayverîn ê KCK’î Cemîl Bayik û Besê Hozat mesajê muhîmî day. Hozat û Bayik Med Nûçe rê qisey kerd û weçînayinan ra hetanî tecrîdê vera Ocalanî, xeylê meseleyan sero qisey kerd.

Hevserokê Konseyê Rayverîn ê KCK’î Besê Hozat û Cemîl Bayik Herêmanê Pawitinê Medya de, tewrê programê taybet ê Med Nûçe bî û cewab da persanê Erdal Erd, Veysî Sarisozen, Rojbîn Ekîn û Ramazan Olçen’î. Serniyê programî de Bayik siyasetê AKP ê derheqê weçînayinê 7”ê hezîrani sero vindart û vat: “AKP nika çiyê pêşkeşê şaranê Tirkiye nêkena. AKP wazena bi sîstemê serokîn fina bîn, şaranê Tirkiye bixapeyno. AKP wazena bi siyasetê aloza, şarî bitarsayno. Emrê îktîdarê xo derg bikiro. La belê enê siyasetê alozîn ê AKP jî, hinî pere nêkeno. Kobanê de fina bîn belû bi AKP çiqas dişmenê kurdane. Eynî wext de vejiya werte, AKP qandê elewiyan çiqas talukey.”

Bayik’î siyasetê CHP û MHP sero jî wina vat:” CHP wazena verniyê HDP bigiro. Xora MHP qe çiyê pêşkeş nêkena. Siyasetê AKP, CHP û MHP, biyo sebebê girebiyayinê siyasetê Tirkiye. Nika HDP wazena enê girey akiro û meseleyan çareser bikiro. Sebebê vêşîbiyayinê eleqeyê qandê  HDP jî, eno siyasetê HDP yo.”


Dewleta tirk û AKP çareserîn nêwazenê

Bayik’î eleqe ant hewldananê Rayverê Şarê Kurd Abdullah Ocalan’î ê qandê çareserîn jî ser û vat:  “Rayver Apo wazeno mesele çareser bikiro. La belê dewleta tirk û AKP çareserîn nêwazenê. Ma badê vengdayişê Rayver Apo, dest bi hedreyinê kongreyê PKK kerd. La belê senî ki Erdogan’î vat meseleya kurd çiniya û mudaxeleyê demê çareserîn kerd, sebebê kongrey werte ra hewadiyay û ma jî kongre îptal kerd. Eki dewleta tirk goreyê mutabakatê Dolmabahçe hereket bikiro, çarçiweyê 10 madeyanê Rayver Apo de dest bi muzakereyan bikiro û komîteyan rono, PKK hedreyo kongreyê xo virazo û derheqê lejê vera Tirkiye de qerarê bigiro.”

Bayik êrişê vera HDP sero jî vindart û wina vat:” AKP xeylê cayan êrişan organîze kena. Operasyonan virazene. Wazenê ma cewab bidê. La belê ma cewab nêda û ma nêdanê. Ma nînê kayê AKP.  Gerek quwetê demokrasî jî, vera kayanê AKP bi aya hereket bikirê.”


‘Sîstemê ki Erdogan qalê ci keno, sîstemê padîşahîn o’

Hevseroka Konseyê Rayverîn ê KCK’î Besê Hozat jî programî de eleqe ant siyasetê lejwazîn ê AKP ser û vat:” Hereketê ma,  qandê firsed bidê AKP, xeylê finan adirbirnayin îlan kerd. Ma stratejiyê çareserînê siyasî û demokratîk esas girot. Ma tim desteg da partî û quwetanê demokratîk. La belê AKP, siyasetê lej esas giroto. Nika hedreyinê lejê badê weçînayinî keno. Wazenê HDP binê bendê weçînayinî de biternê û bado jî dest bi lehê zafhetin bikirê. Çiyê winayin jî yenê mahneyê kaos û lejê zerî. “ Besê Hozat persa derheqê sîstemê serokîn ser jî wina vat:” Sîstemê ki Erdogan qalê ci keno, sîstemê padîşahîn o. Sîstemê faşîzan o. Coka mayê qe jew wext desteg medê sîstemê winayinî.” 

Hozat vatenanê Erdogan ê zey meseleya kurd çiniya ser jî wina vat: “Erdogan’î siyasetê înkar û çinêkerdin fina bîn vist dewre. Nika werte de demê çareserîn nêmendo. Demê diyalogî jî nêmendo. AKP wazena wextê weçînayinî de lej vejiyo û rayanê neteweperestan bigiro. Bi vatena bîna AKP, adirbirnayin qedînayo û lej îlan kerdo.” 


 BEHDÎNAN