Stenbol de reyna weçînayîş ame viraştene û netîceyê weçînayîşî de Ekrem îmamogluyî qezenç kerd. Hemserekîya Konseya Rayberdişî ya KCKyî derheqê weçînitişanê Stenbolî de eşkerayîyêk daye.
KCKyî dîyar kerdo ke hemleya ‘Ma tecrîdî bişiknê, faşîzmî birijnê û Kurdistanî azad bikerê’ ke Tevgerê Azadîya Kurdan û hêzanê demokrasîyî bi heme leteyanê xo menga Teşrîna Peyênaa 2018î de dabî destpêkerdene, hem berê Îmraliyî akerd, hem zî derbêka girane da faşîzmê AKP-MHPyî ro’ û wina dewam kerdo: “Binkewtişê nê tîfaqê faşîstî yê Stenbolî netîceyê hemleya ‘Ma peynîya faşîzmî bîyarê, Tirkîya bikerê demokratîke’ de bi. Loma aya ke bi ser kewte û bi ser fînaye, xeta Rayber Apoyî ya demokratîkkerdişê Tirkîya ya ke bingeyê tîfaqê demokratîkî ser o ronîyaya.”
KCKyî dewamê eşkerayîye de wina vato: “Hêzanê demokrasîyî û şarê Kurdî bi tewirê xo yê 23ê Hezîrane seba demokratîkbîyayîşê Tirkîya îmkanê pîlî û zemînêkê xurtî afernayê. Halêkê winayênî de partîyê olîgarşîkî yê ke heta nika bîyê îqtîdar yan do serê bingeyê pêameyîşî de bibê hetêkê prosesê demokratîkbîyayîşî, yan zî do bi hemleya demokratîkbîyayîşî raste ra wedarîyê. Weçînitişê 23ê Hezîrane seke HDPyî zî vatibi agêra referandûmêkê demokrasîyî. Şarê ma yê ke weçînitişê Stenbolî de vera fehmê faşîstî de tewirêko polîtîk ramot, ganî bi tîfaqê xo yê demokratîkî û têkoşînê xo, yan nê zihnîyetê îqtîdarî ver bi demokratîkbîyayîşî biancê yan zî raste ra wedarê.”
Wa têkoşînê dewmokrasî û azadîye bikerê gird
KCKyî peynîye de veng dayo heme hetan û wina vato: “Ganî her kes na rastîye bizano; Tevgerê ma yê azadîye, şaro Kurd û têgêrayîşo sîyasî yo demokratîko ke bi xeta Rayberîye virazîya, sey verî do tîya ra tepîya zî xeta Rayber Apoyî de têkoşînê demokrasî û azadîye bikerê gird, bingeyê demokratîkbîyayîşê Tirkîya û azadîya şarê Kurdî de, têkoşînê demokratîkkerdişê temamê Rojhelatê Mîyanênî bi her hawayê fedakarîye bidomnê.”
ANF / BEHDÎNAN