Azayê Komîteyê Rayverîn ê PKK’î Murat Karayilan derheqê kerdenê vera Rayverê Şarê Kurd Abdullah Ocalan, weçînayinê 7’ê hezîrani û demê çareserîn sero ANF rê qisey kerd.
Karayilan’î serkewtinê HDP ê 7’ê hezîrani zey serkewtinê tarîxî hesibina û vat ki, fina siftayino kesê teverê sîstemî de terniyayê, zey partî kewno meclîs.
Karayilan’î ard ziwan ki peyniyê enê serkewtinê tarîxî de, kedê têkoşînê azadî ê 50 serrîn esto û wina vat: “Rayver Apo, bi projeyê xo, raya têkoşînê demokratîk akerd. Serkewtinê HDP, qandê Hereketê Azadiyê Kurd, quwetê demokrasî, çep û sosyalîst ê Tirkiye jî, qezencê muhîmo. No het ra, serkwetinê HDP, qandê heme şaran û kulturan, serkewtinê muhîmo”.
Karayilan’î, tabloyê badê weçînayinî vejiyayo werte jî, zey meclîsa ronayox hesibinê û vat: “Eki meclîsa newî goreyê meclîsa ronayox hereket bikiro, bişo xeylê çiyanê muhîm bikiro.”
Talukeyê siyasetê meşgûlkerdin
Azayê Komîteyê Rayverîn ê PKK’î Murat Karayilan’î ard ziwan ki meseleya kurd hinî ameya merheleyê muhîmo û çareserîna ci jî biyo çiyê mecbûrîn û wina vat: “Gerek hinî peyniyê sîstemê zext û metîngerî biyariyo. Qandê şarê ma, azadiyê Rayver Apo, esas o. Ena saet ra tepiya, Rayver Apo zere de tepiştin, qebûl nêbeno. Coka lazimo gama siftayin derheqê azadiyê Rayver Apo de çebiyo.”
Karayilan vist vîrî ki iyê goreyê adirbirnayinê jew hetîn hereket kenê û vat ki, bi adirbirnayinê jew hetin nêbeno. Lazimo adirbirnayinê 2 hetin bikewo dewre.
Karayilan’î talukeyê siyasetê meşgûlkerdin jî ard ziwan û wina vat:
“AKP badê weçînayinê 11’ê hezîrana 2011, verî siyasetê meşgûlkerdin esas girot. Bado jî heveyê meseley zey bahane mûsnay û 14’ê tîrmeh de vera hereketê ma, lejê zafhetin îlan kerd. Wast siyasetê tasfiyekerdinê Srî Lanka ê vera gerîlayanê Tamîl vera ma bivînê dewre.”
‘Hedefê ma dewleta Tirk Kurdistan de felçkerdinbi’
Karayilan’î dazanayin ki, înan siyasetê AKP pûç veto û derheqê ê demî de enê agahiyê muhîmî day: “Ez bi xo jî, ameya sahaya Zagros. Ma plan kerd, sernî de sahaya Oramar ê xeta Zagros-Colemerg, xeylê cayanê lejkerî bivînê. Ma wast bi jû hamleya wesarê 2013 de, artêşa tirk xeylê cayan ra biqewirinê. Hedefê ma, bi perspektîfê lejê şoreşger ê şarî, lejî xorî bikirê û sîstemê kolonyalîst ê dewleta Tirk Kurdistan de felçkerdinbi. Ma qandê nay, heme hedreyinî kerdî. La belê Rayverê ma, serniyê 2013 de, demê çareserînê newe û hera vist dewre. O çax, şiyayinê heyeta HDP ê Îmralî dest kerd ci.”
‘Lazimîn bi kerden û gamê qanûnî esto’
Karayilan’î damûsnayin ki eki înan tempoyê lejê serra 2012, serra 2013 de heveyna berdayê ravey, o çax hukumetê AKP kewtê û wina dewam kerd: “Çareserînê meseleya kurd xo şert kerdo. Qandê çareserîn heme şertî estê. Eki dewleta tirk ancî meyro çareserîn, o çax lejê gird bikewo dewre. Lazimîn bi kerden û gamê qanûnî esto. Nika ra tepiya çi bibo, gerek made bi made bibo û îmzey çebiyê bin. Heta çiyê winayin nêbo, çareserîn û raveyberdina çareserîn mumkun niyo.
Karayilan derheqê rewşê gerîla de jî qisey kerd û wina vat:”Quwetê gerîla, hetanî nika goreyê mesûlînê xo hereket kerd. Lazimînê adirbirnayinî ard ca. Helbet no maben de, xo qandê heme îhtimalan kerd hedre jî. Gerîla qandê demokrasiya Tirkiye û çareserînê meseleya kurd, quwetê temînatiyo.”
Veng da gencan
Azayê Komîteyê Rayverîn ê PKK’î Murat Karayilan’î peynî de jî ard ziwan ki tewribiyayinê gencan ê gerîla her roj heveyna beno vêşî û wina veng da gencan:” Niha ma, resaymi, jew merheleyê tarîxî. Enê rojanê peyinan de tewrbiyayinê gencan biyo zaf. La belê lazimo tewrbiyayinê gencan heveyna zaf bibo. No çarçiwe de, ez veng dana heme gencanê welatperwer ê Kurdistanî û vana, enê merheleyê tarîxî de, bêrê tewrê miyanê qelfeyê gerîla bibê.”
ANF/BEHDÎNAN