MELEK YUKSEL / ANF
Her ke referandûm nêzîk beno, hetê cîya cîyayî bin cepheyê nêyî de kom benî û çira do bivajî nê, aşkere kenî. Nê hetan ra yewe zî kedkarê sînema yî. Kedkaranê Sînema ra Ahmet Kaplanci, Welat Yalçin û Îbrahîm Yildirimî qisey kerdî û fikrê xo aşkere kerdî.Kaplanciyî va ‘eke referandûm de ‘ya’ bivejîyo, do welat de dîktator hakim bibo’ û qiseykerdişê xo wina domna: “Wextê xoverdayîşê Sûr, Cizîr û Nisêbîn de bi seyan merdimê ma merdî. Her çiqas ke dewlete heme hêzê xo şuxilnaye zî nêşîna îradeya şarî bişikna. Wextê îqtîdarê AKPyî yê 14 serran de xeylê çîyê negatîfî qewimîyayî; ekonomî serûbin bîye, bacî zêde bîyî û sewbîna. Nêyî daxî seba vatişê nêyî bes o. Prosesê referandûmî de ti partîyanê bînan rê heqê propaganda nîno dayîş. No wextê Mussolînî û Hîtlerî ano vîra merdimî. Seba ke şar nêbî qurbanê îqtîdarî, dezgehî nêrî padayîş û çapemenîye nêkewo bin zextan ez her kesî dawet kena ke wa vajî nê.”
‘Her kes terorîst o'
Yildirimî zî va ‘seba ke têkoşînê demokrasî bi hawayo qerardarî bêro meşnayîş, ma do vajî nê’ û wina domna: “Ewro heme kesê ke sey îqtîdarî nêfikirîyenî, sey terorîst yenî dîyîş. Akademîsyenî tewqîf benî, qayûm tayînê şaredarîyan benî. Ekonomî îflas kerda û dolar resa dûştêko tewr berz. Êdî merdimî nêeşkenî nan bîşêrî keyeyê xo. No nîno qebulkerdiş. Nika hepisxaneyî pir bîyî û nê kesê ke tewqîf bîyî zî kesê ke îxtîmal esto ke vajî nê yî. Mesele bi vatişê nê, nêqedîyena. Eke 16ê Nîsane de nê bivejîyo, ganî ma do hîna zaf têkoşîn bidî.”
Seba ke qetlîyamî nêbî ez vana ‘Nê’
Yalçinî zî qiseykerdişê xo de bale ant kesê ke wextê xoverdayîşê xoserîye de şehîd bîyî û wina va: “Çîyê ke bi Sûr, Cizîr, Şirnex, Nisêbîn û Gever de ameybî cuyayîş, ma bi rayîrê çapemenî agahdar bîyî. Mîyanê çend aşmanê peyênan de bi Qerarnameyê Hukmê Qanûnî (KHK) xeylê dezgehê çapemenî ameyî padayîş û kilît dîya beranê înan ro. Parlamenterê ke îradeya 6 mîlyon merdiman bîy, ameyî tewqîfkerdiş. Cok ra ma do vajî nê.”