RUKEN DEMÎ/AYŞE SURME MA/ÎZMÎR
Ekolojîstî qezaya Çeşme ya Îzmîrî de vera talankerdişê tebîetî de reaksîyon nawnenê. Serra 2013î de Çeşme de viraştişê Santralê Enerjîyî yê Vayî (RES) ame plankerdiş û erdê ke viraştişê santralî ameyêne plankerdiş, erdê hemwelatîyan bî.
Na rewşe ra dima hemwelatî, ekolojîst û wayîrê erdan reaksîyon nîşan dayî. Nê hemwelatîyan ra yewe zî keyeyê Verfeka Platformê Cuye Esen Kabadayi ya. Babete ser o Esen Kabadayiya (33) ke bi kênaya xo ya yewe serra Ella reyde çalakîye de ca gêna, qisey kerde. Kabadayi û kênaya aye Ella seba tebîetî têkoşîn danî.
Kabadayiye qiseykerdişê xo de wina va: “Ganî ma rêzdarî nizdîyê tebîetî bibî. Erdî kalikê mi ra mendî. Îdarekarê RESî wazenê ke erdê kalikê mi ma ra bigîrî. Ez na rewşe ra dima têkoşîndayîşî musaya. Sere de ez û pîyê xo ma reaksîyon nawitî, labelê bi kepçeyan kewtî erdê ma mîyan. Pîyê mi merd û nika ez û kênaya xo ma têkoşîn danî. Ez û Ella ma beşdarê kombîyayîşê ekolojîstan benê. Ez seba ameyoxa domanê xo têkoşîn dana. Ganî doman tebîet bişinasnî û wayîrê tebîetî bivejyî.”
Ganî ma têkoşîn bidî
Kabadayiye qiseykerdişê xo wina qedênaye: “Her cayê Tirkîya de polîtîkayê talankerdişî yenê ramitiş. Seba rantî erdê şarî destê înan ra yenî girewtiş û îstîmlaq benî. Herçiqas ke tapuyê ma estbî, labelê reyna zî erdê ma ser o santralî viraştî. Ma înan dayo mehkeme, labelê hêrişê ma kerdî. Hakim, dozger, îdarekar û heme kesê ke destur dayî viraştişê RESan, teşebbusê derbe ra dima endamîya cematê FETOyî erzîyayî zîndan. Îqtîdar û huqûq hetê sermayegozan de yî. Ez bawer kena ke eke ma wayîrê tebîetî bivejyî do ameyoxe hîna weş bibo. Ganî ma seba xo û ameyoxa domanan vera kapîtalîzmî de têkoşîn bidî.”