Rixmê aşma Remezanî zilmê dewleta Tirk o vera Kurdan kêm nêbeno. Taxanê Alîpaşa û Lalebey yê Sûrî de talan û welişnayîş rameno. Zabitayê ke kewtî taxî, xortimê ke malbatan seba kirêştişê awe antibî, birnay û bi vatişanê “Kam ke aw bido înan do keyeyê înan bîro xirabkerdiş” welatijan tehdît kerdî.
Qezaya Amed Sûr de taxanê Alîpaşa û Lalebey de no 20 rojî yo awe û elektrîk ameyo birnayen. Rîwalê no rewşî taxijî zehmetîye girdî ancenê. La rixmê nê zehmetîyan zî ronişteyê nê taxan destûr nêdanê ke keye û taxê ci bîrê rijnayîş. Şaredarî xîzmetê pakî û tenduristî nêdano taxan û zabite rişnay taxan.
‘Înan rê awe çin a’
Zabiteyê ke rişnîyay taxan, mekteb, camî û qehwexaneyê ke awe danê taxan îqaz kerdî ke hinî awe nêdê. Ekîbê zabiteyî xortimê awe yê ke şarî bi îmkananê xo antibî birnay û vatî, “Înan rê awe çin a. Kam ke aw bido înan, do keyeyê înan bîro rijnayîş.”
Alîpaşa û Lalebey de no 20 rojî yo awe û elektrîk çin o. Cinî bi bîdonan camîya Melîkahmet ke durê keyeyê ci ya ra awe kirêşnenê.
Cinîyêka ke vera nê kerdenan nêrazîbîyayîş damûsna wina va: “Aşma Remezanî de zilmê Kerbela ma rê kenê. Bi sebebo ke ma va ma keyeyê xo terk nêkenê, her çî ma rê ferz kenê. La rixmê nayî zî ma nêvejyenê. Kes vengê ma nêaşnaweno. Wa tankerêka awe bîyarê taxa ma û ma het de vinderê.”
ANF/AMED