S. ASUMAN DEMÎR / ANF/STENBOL
Demanê peyênan de bitaybetî zîndanê Xarpêt, Tekîrdag, Wan û sewbîna xeylê zîndananê Kurdistan û Tirkîya de xeberê zext, neheqî û îşkenceyan yenî. Xeberê ke yenî nîşan danî ke konseptêko newe erzîyayo dewre.
Babete ser o Endama Komîsyonê Zîndanî yê Platformê Huqûqnasanê Azadîwaştoxan Şule Recepogluye qisey kerde. Recepogluye va ‘neheqîyî OHALî ra ver estbî, labelê OHALî ra dima bi KHKyan ameyî meşrûkerdiş’ û wina dewam kerde: “Nika zîndan de polîtîkayê tek tîpî, surgin, tedawînêkerdişê hepsîyanê nêweşan, zêdebîyayîşê neheqîyan û sewbîna xeylê kerdişê kêfî estî. Heqê pêvînayîşê 3 kesan yê hepsîyan destê înan ra ameyo girewtiş, pêvînayîşo akerde bîyo 2 aşman ra reyêk, rojname û kitabî ameyî qedexekerdiş, dîlekçeyê ke hepsîyî nusenî çimê înan ver de erzîyenî çop û sewbîna xeylê neheqîyî estî. Reyna hepsîyê nêweşî nînî tedawîkerdiş. Polîtîkayê surginî, polîtîkayê dewlete yî.”