Mesud Berzanî serekê vaşurî yo kan û serekê PKDye heto ju ra radyoyê Amerîka ra vano: “Leşkerîya Iraqî û Heşdî Şabî bi çekanê Amerîka êrîşê ma kerd. Amerîka qet veng nêvet. Ma şok bîme.”
Heto bîn ra kî vano: “Leşkerîya Iraqî û Heşdî Şabî bê sîndor êriş kerdêne. Ma seba ke pêşmerge xo ver medo, ceng mekero, zaf xebetîyayîme. Herêmê ke qalê ci beno, ma bi haştîye teslîm kerdî.”
Ewro kî kombîyayîşê PKDî de vajîno: “Zereyê ju partîya kurdistanîye de tayê kesan bi hetkarîya teberî bi îxanet îmza eşte binê pêymanê dizdênîyayî û nîya kî bî sebebê felaketa Kerkukî û cayanê bînan.”
Vatenî jubînî nêgêne, verpersîyarîye nîyanê re zon. Bi no qeyde mordem nêreseno raştîye û verpersîyaran. Lê seba ke mordem bireso raştîye û verpersîyaran, seba ke mordem meselaya Kerkukî û cayanê bînan fam bikero, gere hetanî 20 serran pêyser şoro û rewşa vaşurî de rêyêna nîya do.
Gelo vaşurê welatî de rewşa hukumatî, burokrasî, partîyan, leşkerîye, aborîye, perwerdeyî, sazîyanê sîvîlan, roşnavîran çito bîye.
Verde aborîye ra dest bikerîme ci: Se ke zanîno bi zorê Amerîka hukumatê amê avakerdene, lê hetê ra serdestîya Hewlêrî, hetê ra kî serdestîya Silêmanî zaf zelal asêne. Yanê her çiqas hukumatê est bî kî, Hewlêr de serdestîya PKD û bi naye kî serdestîya Berzanîyan û Silêmanî de kî serdestîya Yekîtîye û bi naye kî serdestîya Talabanîyan nêverda hukumat funksîyoner bo. Na mesela bi girewtena parlamentî û bê funksîyon verdana serekê parlamentî tayêna bîye eşkera.
Hewlêr de çûyê PKD û Silêmanî de kî çûyê Yekîtîye hukum ramitêne. Burokrasî ne zê ju burokrasîyê dewlete (federal bo kî) lê zê burokrasîyê partîyan kar kerdêne. Seba nê di partîyan seba burokratan hurêndîya lîyakatî de mordemîye muhîm bîye û bi naye kî burokrasî kî disare bî.
Partîyê vaşurî seba vaşurêde xoser û azadî ra zêdêrî seba hukumê partîyan xo xebetîyayî. Naye mordem tewr rind disaretîya hukumatî, abarîye û her çî ra ver kî leşkerîye û îstîbaratî de vîneno.
Seba ke hukumat ju û funksîyoner nêbî, partîyanê vaşurî hem nêwaşt û hem kî nêşîkîyayî pêşmergeyan binê ju komandantîye de biyarê tê lewe û nîya kî leşkerîyêde nîzamî ava bikerê.
Hêya duştê DAIŞî de pêşmergeyan qeremanîye kerde, xover da, welat parêzna. Lê gere mordem xo vîrî ra mekero, hêna ke Amerîka û dewletanê bînan hetkarîye nêkerde, zê ewroyî, pêşmergeyî zaf cayan ra xo pêyser ant. Na xo pêyser antene kî partîyanê vaşurî re nêbîye derse, parçebîyene dewam kerd. Serde kî verpersîyaran ra hesab nîyamê pers kerdene.
Aborîya vaşurî burokrasî ra, leşkerîye ra rindêrî nêbîye. Ruşvet, xomordemîye, îmtîyaz, qançur nêgirewtene bîbî qural. Hemwelatîyan nêzanitêne pereyê petrolî kata şonê, servetê burokratan, serekan û kadroyanê partîyan kotî ra êno, îhaleyî sê amêne kerdene. Bazirganîya ke Tirkîya û Îranî de amêne kerdene kî tarî bîye, bincil bîye. Hetê ra şarî feqîrîye antêne, memuran maaşa xo nêgirewetêne, lê heto bîn ra zewq û sefayî, îsrafî sarê girewt bî şîyêne.
Hênî bîbî ke êndî vaşur de zafêrîye nêxebetîyêne. Zengînan xo rê welatanê bînan ra karkerî, xizmetkarî ardêne. Welatê awe de, welatê mal û dawarî de, awe û do kî Tirkîye ra Îran ra amêne.
Bêguman eke hukumat, partîyî, leşkerîye, aborîye nîya bo, perwerde kî nînan ra cîya nêbîyêne. Meselaya Soran û Behdînanî zê beşanê bînan perwerdeyî de rolêde girs kay kerdene. Perwerdeyêde şarkî nîyamê ava kerdene. Domananê serekan, kadroyanê partîyan, burokratan mektebanê rindan û bahayan de, ê feqîran kî ya mektebanê normalan de wendêne ya kî qet nêşîyêne mekteb. Zafêrîya mektebanê namdaran destê kesanê nedostan de bîye.
Rewşa sazîyanê sîvîlan tayêna giran bîye. Çike hetê ra îmkanê nînan çînê bî û hetê ra kî her partîye waştêne, ke wa nê sazîyî girêdayîye înan bê. Sazîyanê azadan de xebetîyene zamet bîye.
Rewşa roşanvîran -xêca çend kesan- rewşa tewr xirabe bîye. Çike manaya dîrokkî de roşnavîr û roşnavîrîye welatê ma de ravêr nêşîya. Mordemek vano: “Ez roşnavîr a.” Lê ju kadroyê partîye ra zêdêrî partîcîyênî keno. Rexne, fikirê bîn, vernîyaz nêzano. Her çîyî sîya û sipê vîneno. Ti ya ma ra wa, ya kî dişmenê ma wa.
Heto ju de çekuyê zê “xayînî”, “ajanî” û heto bîn de kî “qehremanî“, “welatparêzî” hewa ra gêrenê. Roşnavîrê hetê juyî rexneyê hetê bînî nêkenê û raşteraşt dişmenîye hetê bînî kenê.
Tayê roşnavîrî kî binê nameyê rexneyî de dişmenî û zereweşîya xo anêr re zo. Ti vana qeyî koledaran parçeyê welatî îşqal nêkerdo, mal û milkê Berzanîjan ya kî Talabaniijan îşqal kerdo.
Seke hukumat, burokrasî, leşkerîye, aborîye û perwerde hênî kî roşnavîrî yê.
Bê nivisî zêdêrî derg mekerî; Gorê bawerîya mi eke meselaya Kerkukî û cayanê bînan de îxanet est bo kî, kaleka verpersîyaranê bînan de -zê tayê kadroyanê Yekîtîye-, Mesud Barzanî seba ke çend serrî yo hem serekê vaşurî û hem kî serkomandantê pêşmergeyan pêrîne yo, wayirê verpersîyarîyêde girs o.
Seba ke gamê ravêr di gaman pêyser mêrê eştene, gere:
Parlamanto teba funksîyonanê xo pêroyîne bêro rakerde.
Seba verpersîyaranê bîyeranê Kerkukî û cayanê bînan Komîsyonê wekinitenêde partîyan ra azad bêro ava kerdene û verpersîyaran -Kerkuk, Mexmur, Şengal ra hesab bêro persayene. Eke 2014 de hesab bîyamêne perskerdene, ewro kî nîya nêbîyêne. Na bêcezatîye cesaret dana tersonakan, çûyanê dewletanê bînan.
Seba serekîye û partîyan weçînitişêde demokratîk bêro kerdene. Hukumatêde demokratîk bêro ava kerdene.
Duşte ruşvet, dizdîye, îltîmasî komîsyonêde teberê partîyan bêro ava kerdene û no wayirê funksîyonî bo.
Vaşur de disaretîye, Hewlêr û Silêmanî bêro wedardayene.
Partî û sazî tesîrê malbatan ra, strukturanê feodalan ra bêrê temîz kerdene.
Seba jutîya Kurdan kongreyê bêro ava kerdene û na kongre de her parçe ra, her partî û sazîyên Kurdan, kêmşar û kêmdînan ca bigêrê.
Gere verde partîyan de pêyco burokrasî, aborîye, perwerde û leşkerîye de heskerdoxê Tirkîya, Îranî û İraqî; hetkarê Tirkîya, Îranî û İraqî; partner û şîrigê Tirkîya, Îranî û İraqî; bêrê eştene, nê sazî bêrê temîz kerden.
Koledaran de tekîlîyî goreyê şertan bêrê serrast kerdene.
Kesê ke têkilîya xo ya aborîya nê welatan de est a, wa têkilîya xo de dewam bikerê. Lê qet cayêde fermî de gere ca megêrê.
Servetê Kurdistanî seba şaranê Kurdistanî!