Kampanyaya ardimî raştê eleqayêka pîle amey. Qurbanê ke ameyê arêdayîş teslîmê kesê muxtacan bîyê. Serekreterê Pêroyî yê Şaredarîya Şaristano Gird yê Amedî Zulkuf Karatekîn kesê ke destek dayê kampanyaye ardimî înan rê spas kerd.
Şaredarîya Şaristano Gird a Amedî mîyanê şaristanî de semedê welatijê destteng û kesê ke Rojawan û Şengal ra ameybî bajarê ma Kampanyaya Dayîşê Qurbanan dabî destpêkerdiş. Qurbanî ke ameyê arêdayîş teslîmê wayîrê îxtîyacî bîyê.
Serekreterê Pêroyî yê Şaredarîya Şaristano Gird yê Amedî Zulkuf Karatekîn derheqê xebatan de malumat da. Karatekînî îzeh kerd ke heywanî ke Raşteya Komirî ya Tevzî de unîteya Mobîlî de ameyê birnayîş teslîmê kesê muxtacan bîyê.
Karatekînî qalîkerdişê xo wina domna: “Ma wesîleyê Roşanê Qurbanî ra waşt winasî yew xebate bike. Ma aye ra kesê ke halê înan baş o ra waşt wa destek bidî na kampanyaye. Sek ma zanê şaristanê ma de xeylê kesê destteng estê. Zaf kesî Rojawan û Şengalî ra koçê şaristanê ma kerdê. Paştîdayîşê pîl dîya na kampanyaye. Kesê ke destek dayê na kampanyaye ma înan rê spas kenê. Kampanyayê ma ê ardimî dewam kenê.”
Wa ardimî bidomî
Karatekînî îzeh kerd ke semedo ke qurbanî biresê wayîranê ci xebatêk ameya viraştiş û wina vat: “Qurbanî ke ameyê dayîş zî pêro resayê cayê xo. Rojê roşanan, rojê paştîdayîşê yewbînan ê. Ardimkerdiş muhîm o. Ma wazenê wa nê ardimî tenya roşan de nêmanê û dewam bikerê. Ez onca kesê ke destek dayê na kampanyaye, înan rê spas kena. Homa xeyrê înan qebûl bikero.”
AMED