Îdrîs Naîm Şahîn, ya kî Îdrîs Mayin Şahîn. Gorê mi namê 2îne tenena şîkîno ro ci. Mordemek teqeno.
Kamî no mayin no ro? Tabî Rcep Tayyîp Erdoğanî. Erdoğano ke werte ra fetelîno, demokrasî ra qesey keno, birayenî ra qesey keno, jû maske wa.
Îdrîs Mayin Şahîn ke qesey kerd, bizonoke badena Erdoğan teqeno. Îdrîs Mayin Şahîn beg aynê demokrasiya Erdoğanî yo. Erdoğan çiqas demokrat o, naye ma qeseykerdena Îdrîs Mayin Şahîn beg de vîneme. Heşto peye meclîsa tirkî de onca hebe hurenayîs bî. Verva Îdrîs Mayin Şahîn koma BDP jû perskerdis (gensoru) da bî. Çike bî, o waxt bî. Her zira, dim pera.
Se ke nêvat, raştiya Erdoğanî, çi fikrîno, hewnê xo çiko, kamî ra haskeno, zerre de çi esto, nînan pêroyîne waxto ke Îdrîs Mayin Şahîn û gegane kî Cemîl Çîçek qesey kerd, hebena zelal naskeme.
Erdoğano rastken zonê nînan de sewq dano.
Heya, Îdrîs Mayin Şahîn heşto peye, aleviyan, zerdûştiyan, mislimanan û ezîdiyan rê heqeretê girşî kerdî.
Ala vazê, torê çi dêsê kamî ra resmê kamî esto. Na dîna de teyna mûnafiqê jê to çînê, Mayin beg!
Ti nêşîkîna ezîdiyan, aleviyan û dînanê bînan rê heqeret bikerê!
Heto bîn ra vano, ‘BDP ke nêbo, cêvê birayanê mi kurdan beno pirrê peran.’
Îta de beno eslera ke, dînê na mordemî, îmanê na mordemî, vijdanê na mordmî cizdan o. Heqanê kurdan ci nêdano, sew û roz qersunu vorneno ser, ebi peran keno xayîs.
Onca BDP ra vano, ‘nînan ra kurdan rê xêr nêamo.’
Herhalde rozê jû wirzeno ra na mêrîkî ra vano ‘nê la lawo, bi to na dugele rê xêr nêamo, bi to na dugele rê jû xiyar amo.’
Ma, alevî, mislimanî û ezîdî dîn çiko, Îdrîs Mayin Şahîn ra nêmuseme.
Eke xo rind şut, kerd pak û sond werd ke reyna murdariye nêkeno, kurdî dersa mislimaniye danê ey. Zovîna hen mûnafiq maneno.
Mi vat, eke no mêrik aynê Erdoğanî nêbiyenê, wastîsê Erdoğanî era zon nêardenê, rew ra raya çeyî guretî bî.
Hama Erdoğan xo çe nêrusneno.
Qeseykerdîsê xo de Mayin beg qalê kesegan zî kerd.
Ma efendî, destê keseganî jê destunê to gonî de niyê. Kesegan heywanode pîr û pak o. Ti keseganî jê nahletmî memusne, gonya destunê xo de niyade!
Mevaze ke na dîna torê, simarê manena. Dewro no çerexîno.
Ma de qese esto vanê: Veyvê merî hata ke pisinge amê, devam keno.
Rozê yena veyvê sima qedîno, keyfê sima remeno!