Bi payîzê re rengên xwezayê bi carekê pirr dibin, diguherin, heta ku kirasê zivistanê li xwe dike ev reqsa hanê ya rengan dewam dike. Ev jî para bêhtir bi hişkbûn û weşiyana pelên daran re elaqedar e. Baş e çima pel rengên xwe diguherin? Sedem pirr besît e; ji ber ku roj kin dibin, pelên daran hindiktir klorofîlê hildiberînin û paşê hew hildiberînin. Klorofîl jî rengê wan ê kesk ê bihar û havînan dide daran. Êdî kava keska ku di nava pelên daran de ya herî darîçav e, namîne, pîgmentên rengên din derdikevin meydanê û xwe nîşandidin. Pîgmentên ji wan re karotenoîd tê gotin rengên zer û pirteqalî derdixin holê, herçî sor e bi xêra wan pîgmentan e ku ji wan re antosiyanîn tê gotin. Axir keska wan kêm dibe, zer, sor û pirteqaliya wan zêde dibe, belê giya keskê li dîmen temam dike. MÛŞ