Semedê ke konsepta şerî hemverê şarê kurd ameyo destpêkerdiş Farqîn, Licê, Sûr, Şemzînan, Gimgim, Silopî, Gîyadîn û zaf cayanê Kurdistanî de şer dom keno. Qezayan de gule bi keyan ra yenî varnayîş, cayê karê înan yenî veşnayîş û qirkerdişê sîvîlan dom keno. Heyeta cigêrayîşî ke tede hemsereka DBPe ya şaristanê Amedî Hafîze Îpek zî esto semeda cigerayîşê hedîseyî şîyî cayo ke nêy hedîseyî qewimyayî. Tîya de Hafîze Îpek veng da şarî ke wa herra xo nêteriknî û xover bidîy û wina vat: “Lazim o mayêy gerîla, polîs û lejkeran destê xo bidîy yewnan û bibî yew.”

Destpêkerdişê şerî yo
Îpek dergeyîya qalîkerdişê xo de bal ant ser ravêreyeya peynî û wina domna: “Medyaya hetgir hewl danîy ke têkîlîya şarê kurd û tirkan biqerifnî. Çapemenîyê Erdoganî bi no hawa çîyo ke qewimyeno ya goreyê menfîetê desthilatdarî anî ziwan yan zî qet nêdanî. Yew hetî ra daristanêy ma yenîy veşnayîş, qetlîyam virazyenî, hetê bîn ra zî gule ser şaro sîvîl ra yeno varnayîş. Ma zî sey partîyê sîvîl hewl danîy ke verpersîyarîya xo bîyarî ca. Çîyêy ke yenî cuyayîş heme heyfgirewtişê weçînayîşê 7’ê hezîranî yî.”

Wazenîy parçe bikî
Îpek derheqê weçînayîşê 7’ê hezîranî de ard ziwan ke cayo ke şar qet veng nêdayo AKPe de qetlîyam yeno viraştiş û wina domna: “Hemverê şarê ma çekêy lulederge yenî xebetnayîş. Cenî, doman û pîr nîno vatiş û ser hemînan gule yeno varnayîş. Şarê ma nêy hêrişan ra qet nêterseno û do tepa gam zî nêerzo. Çepê êy de şar do ser celadê xo bimeşo û tu biko rîyê celadê xo. Licêyê de şar him semeda gerîla û him zî semeda lejkeran xo kerdî tirso ganî. Labelê lejkerî şarê ma sey dişmen veynenî û hêriş kenîy. Halbuk ma nêwazenîy mayî bibermî û gonî birijyo. Êy do şaşitîya xo fam bikerî labelê do wextê ci şêro. Îqtîdar zano ke cayo ke HDP tede xurt o nêşkeno dizdêy bikero, na semed ra wazeno HDPe werte ra wedarno.”

Pêvînayîş dest pê bikî

Îpek qalîkerdişê xo wina bi peynî kerd: “Semeda vindarnayîşê no şerî lazim o Rayverê Şarê Kurdî rey pêvînayîşî rayna dest pê bikerî û semeda azadîya ci çi hewce biko lazim o bêro kerdiş. Konsepta şerî ya AKPe domanê 3 serre yî daxî hedef gêno. Wazenî biagêrî serranê 90’î, la wa vîr nêkî ke kurdî aye kurdê kan nîy. Ger ke şar biwazo ma do îlankerdişê xorayîrberdişan bidomnî. Ez veng dana heme şarî, wa keye û herra xo nêteriknî. Tîya keye, herre û îradeya şima ya. Ti kes nêşkeno şima tîya ra dur biko. Bimanê û xover bidê.”


Berîtan CANOZER
JINHA / AMED