Êzidîyî hêrişê DAIŞî ver ca û warê xo verdaybî û kampa ke hetê Şaredarîya Nisêbînî ra amebî amadekerdiş de ca bîbî. Labelê ‘qedexeyê tebervejîyayîşe kuçeyan’ ra dima êzidîyî tîya ra amebî vetiş û kampa AFADî de amebî bicakerdiş. Keyeyê ke şert û mercê nêbaş de raştê ezîyetî ameybî, nika zî yew bi yewe kampe ra yenî eştiş. Nê keyeyan ra yewe zî keyeyê Xunaf Xelete yo.
Xunaf Xelete va ‘bi zorî ma kampe ra vetî’ û qiseykerdişê xo wina domnaye: “Ma ra vatî ‘kênaya şima baş nîya û nasnameyê şima çin o’ û ma nêgirewtî kampe mîyan. Wezîfedarê kampe vera kênaya min de şîddet şuxulnayî. Seba ke tîya de kesê ma nêxebetîyeno, ma nêeşkenî debara xo bikerî.”
Nêame sereyê ti kesî
Kênaya Xunafe Nura Hesena ke birayê aye çimanê aye ver de ame qetilkerdiş zî wina va: “Ez bîya şahidê qirkerdişê DAIŞî. Çîyê ke ameyî sereyê ma êzidîyan, nêame sereyê ti kesî. Heqaretê ma kerdî û ciwanê ma çimanê ma ver de qetil kerdî. Birayê min o şenik koyê Şengalî de çimanê mi ver de ame kiştiş. Ez bîya şahid ke cinîyê ke nêşînayî domanê xo bigirî, koyan ra eştî war. Ez demêko derg nêameya hişê xo ser û ez problemê psîkolojîk cuyaya. Ma destê nê merdiman ra rizgar bikerê.”Nura Hesene peynîye de wina va: “Sey ke çîyê ke ma cuyayî bes nêbo, nika ma tîya de zî ezîyet ancenî. Ez hetê wezîfedaranê kampe ra ameya kutiş û dima ra zî destê mi kelepçe kerdî. Wezîfedaran polê mi şikit û nika polê mi alçî mîyan de yo. ”
ŞÛJIN/MÊRDÎN