Sîyasetmedarê kurd ê ke grevê veyşanî yê Amedî de ca girotî û ser mesaja Rayverê Şarê Kurd Abdullah Ocalanî 12ê Êlûnê de nûmayişê xo qedînay vistî vîrî ke mesaja Ocalanî zaf zelalaû vatî ‘eke çareserî nêbo xoverdayiş esto’.
Rîwalo ke Rayverê Şarê Kurd Ocalanî ra wextekê derg hayderî nêamê girotiş 50 sîyasetmedarê kurd 5ê Êlûnê de Amed de destpa grevê veyşanî kerdî. Bado ke Mehmet Ocalan şi Îmrali û mesaja Ocalanî ard sîyasetmedaran 12ê Êlûnê de grevê veyşanî qedînay. Nûmayişkarê ke tewrê grevê veyşanî bî aşkere kerdî ke mesaja ke Ocalanî rişta seba şaranê Tirkîye firsetek e û veng day ke wext nîro vinîkerdiş û gam bîro eştiş.
Xoverdayoxê grevê veyşanî Yardimkarê Hemserokanê HDPê Nadîr Yildirim dîyar kerd ke reyna ame vînayen ke Ocalan merkezê haştî yo. Yildirimî da zonayen ke zihnîyet û rojdema çareserî yê hikûmet çinyo û nay her roj anê ziwan. Nadîr Yildirimî aşkere kerd ke cayê ke zihnîyetê çareserî û nezdîbîyayişê çareserîya demokratîk nêbo kurdî dê her tim xover bidê.
Qenalê dîyalogî akerê, gonî vindernê!
Hemşaredarê Seravê Abdulkadîr Çalişkan ke nûmayişa grevê veyşanî de ca girot zî diyar kerd ke pêvacoyî fina da bîn damûsnayen ke bê Ocalanî haştî û çareserî ca nîna. Çalişkanî vist vîrî ke mesaja Ocalanî tenya seba şaranê Tirkîye nê, seba vindernayişê lejê Rojhelata Mîyanî zî çareserî ya. Çalişkanî dîyar kerd ke ganî dewlet goş bido mesaja Ocalanî û bê ke wext bîro vinîkerdiş ganî bi Ocalanî ra pêdiyayin virazo. derheqê babed de Çalişkanî wina dewam kerd: “Seba ke ma emel kerd ke kilîtê çareserî Ocalan o, cok ra ma kewtî grevî. Ocalanî ra mesajeke muhîm amê. Na mesajî zî zerreyê hometî de veng da. Ganî dewlet mesûlîyeto ke kewno ser doşê ci bîyaro ca. Eke wazenê na gonî vinderîyo ganî qenalê muzakere û dîyalogî akerê.”
Ganî hikûmet gam bierzo
Hemşaredara Payîzava Yildiz Çetîn a ke grevê veyşanî de bî zî aşkere kerd ke Ocalanî fina da bîn helwestê xo ya seba haştî damûsna. Çetîn vist vîrî ke mesaja Ocalanî reyna seba haştî bî û va: “Rayverîye bi mesaja xo nayî îspat kerd; Ocalan û şarê kurd çîyo ke kewno ser doşê ci kerdî. Nika yê ke ganî gam bierzo hikûmet a.”
Nûmayişkarê bîn yê grevê veyşanî Hemşaredarê Bêgirî Mehmet Alî Tunçî zî hayr ant ser pêvacoyê nikayî û va ma pêvacoyekê tarîxî ra vêrenê ra. Tunçî aşkere kerd ke senik (tay) kes şenê na pêvacoya tarîxî de ca bigîrê û wina dewam kerd: “Nê kesan ra jew zî Rayverê Şarê Kurd Abdullah Ocalan o. Rîwalo ke no kes bin tecrîdekê giran de bi ma nûmayişeke bi na rengî ca ard. Rayverê şarî rayê demokratîkî tercîx kerd, pêrokîn projeyê ey ser haştî û çareserî yê. Xo ra mesaja ke amê zî na çarçove de bî. Mesaja ke hedefê ci haştî bî. Nayî ra zaf muhîm a. Ganî wayîr bîro vejyayiş.
Goş bidê vengê Îmrali
Mesaja Rayverê Şarê Kurd Abdullah Ocalanî şarî mîyan de zî bî sebebê kêfweşî. Welatijê Cizîr ke bi faşîzma dewlet ra rîbirî mendî, la rûmeta xo ra tawîz nêday Ocalanî ra xeber guretişî ra bî şa. Welatijan ra Îsmaîl Ûca vist vîrî ke bê Ocalan haştî nina no welatî. Ûca da zonayen ke xora Ocalan tim mesajanê haştî dano û wazeno ke hinî gonî (guwîn) nêrijyo. Ûca waşte ke dewlet desinde cewab bido vengdayişê Ocalanî û no herb biqedîyo. Welatijan ra Saadet Sansak zî arde zon ke Ocalan semedê haştî, dewlet zî semedê herb kerdo xo çeng. Sansak vist vîrî ke şar ho pêr haştî do û qalkerdişê xo wina ramit: “Heta ke Ocalan serbest nêbo ma zî nêbenî serbest. Çike ma wazene; wa hinî gonî nêrijyo û semedê nayî gerek goş bidîyo mesajanê Ocalanî. Hatîce Pusat zî aşkere kerd ke Ocalan ra xeber guretiş ma rê yeno maneya newe ra biyayîşî. Pusat Ocalan re dêndariyê xo arde zon û va ‘Ocalan şarê Kurd ard nê rojan.’ Hatîcê Pusat vist vîrî ke bi (pê) tecrîdkerdişê Ocalanî welat çarnîya gola gonîn û nika ganî cewab bidîyo na mesaja ercîyayî. Cizreyij Zahît Dayar zî dazûnayene ke mesaja Ocalanî têna semedê Kurdan nê, semedê ameyişa Tirkîye zî zaf muhîma û va: “Na mesaj vernîya merdişan gêna, ganî her kes na mesaj hol fambikero û gore nayî hereket bikero.
DÎHA /WAN / ŞIRNEX