Şirnex de ciwanê bi nameyê Haci Lokman Bîrlîko 24 serrî, wextê qedexeyê tebervejîyayîşan de bi 28 guleyan amebi qetil kerdene. Dima ra pey wesayîtê zirxinî de amebi girêdayene û erdî ra kirancîyabi.
Hedîse ra dima amebi vatene ke kesê ke nêyî kerdî, kar ra ameyî girewtene, labelê dima ra vejîyabi orte ke ê kesî kar ra nêameyî girewtene, hetta ameyî xelate kerdene. Emser serrgêra 3. ya qetilbîyayîşê Bîrlîkî yo. Heta nika 5 dozgerî bedilîyayî, labelê dosya de averşîyayîşêk nêbîyo. Babete ser o kekê Bîrlîkî Mehmet Bîrlîkî qisey kerd.
Bîrlîkî va ‘demêk ez û birayê xo ma pîya zîndan de mendî’ û wina dewam kerd: “Birayê mi herkesî ser o tesîrêko gird kerdêne. Ma wextê wayîrvejîyayîşê cenazeya ci de zî nê tesîrî dî. Her keyeyo şirnexij, nê mergî hîs kerd. Bi kirantişê meyîtê birayê mi, waştî mesajê ‘ez eşkena ziwan, kultur û cuya to qedexe bikera û meyîtê to zî erdî ra bikiranca’ bidî ma.”
Ma cuya nîmcete ya înan cuyenî
Bîrlîkî dewamê qiseykerdişê xo de wina va: “Ez her ke yena Şirnex, vîrardişê mi ganî benî. O wext ez hîna bihêrs bena. Tena bi hawayo fîzîkî nêrijnayî, hetê kultur û zîhîyetî de zî waştî çin bikerî. Waştî huyayîşê embazanê ma bi ma bidî vîrî kerdene. Ti hêvîya mi tehqîqatê dewlete ra çin a; çimkî kesê ke ganî kar ra biameyêne girewtene, herinda ci de ameyî xelate kerdene. Ma cuya nîmcete ya înan cuyenî. Ti qerar nêşêno dejanê ma kêmî bikero.”
AMED