Her cayê dinya ra hezaran îdarekerê Rayberîya Herêmî, temsîlkarê hukmatan û temsîlkarê STKyan beşdarê kongre bîyî. Kongre de ewil Serekdewletê Kolombîya Juan Manuel Santos qisey kerd û qiseykerdişê xo de behsê muhîmîya têkilîya cuya bajarî û aştî kerd.
Peymana aştî amey silamkerdiş
Kişanake bi silamkerdişê peymana aştî ya ke Kolombîya de ameye îmzakerdiş dest bi qiseykerdişê xo kerd. Kişanake wina va “Eke cayêk de aştî çin a uca de demokrasî nêbena qewetin û aver nêşina. Bajarê Amedî meseleya qewetinkerdişê ekonomîya herêmî de bajarêko biîdîa yo. Ma her serre 2 rey forumanê sosyalan tertîp kenê û bi no qayde şar beşdarê îdarekerdişî beno. Ma derheqê budçeya şaredarî de hesab danê şarî. Ma kombîyayîşê xo yê meclîsî înternet ser o ganî weşan kenê. Ma meclîsê taxan, meclîsê dewan, meclîsê cinî û ciwanan, meclîsê ekolojî, meclîsê astengdar û xeylê dezgehanê sîvîlan reyde pîya qerar gênê.”
Behsê sîstemê hemserektî kerd
Kişanake dewamê qiseykerdişê xo de îzah kerd ke, ê kenê ke modelêko newe awna bikerê û wina va “Ma 102 şaredarîyan de sîstemê hemserektî awan kerd. Bi no qayde tewr cayo berz de hînî cinî temsîl benê. Sîstemê hemserekî nêno manaya qoltixî mabênê cinî û camêrdî de yenê parekerdiş. Na mesela de ma kenê ke rayberîyêka demokratîke ronê. Ma xebatanê xo de kenê ke mabênê cinî û camêrdan de seypêbîyayîş awan bikê. Na çarçewa de ma Serekîya Dayîreyê Polîtîkayanê Cinîyan awan kerd. Ma kenê ke wa cinî her cayê rayberî de temsîl bibê.”
Tayînkerdişê qeyûman
Kişanake peynîya qiseykerdişê xo de wina va “Hukmato merkezî 26 şaredarîyê ke bi weçînayîş ameybî sere wezîfe ra girewt. Herinda înan de karmentê hukmatî ameyî tayînkerdiş. Şaredarî hînî nêeşkena meclîsê xo bîyaro têhet. Cayo ke ci rê kayyumî ameyê tayînkerdiş de qasê 3 mîlyon merdimî ciwîyenê. Na yena no vate: hînî îradeyê 3 mîlyon merdiman çin o. Hîrê qezayanê Amedî de hemserekî wezîfe ra ameyî girewtiş. Hukmatî dest rona şaredarîyan ser. Aye ra ma vanê ganî ewil aştî bêro nê welatî û wa hînî welat cayo merkezî ra nêro îdarekerdiş.”
KOLOMBÎYA