Serekê Baroya Amedî yo Kehen Tahîr Elçî 2 serrî verê 28ê Teşrîna peyêna 2015î de vernîya Mînareya Çar Lingin de amebî qetilkerdiş û vizêr serrgêra 2. qetilbîyayîşê Elçîyî bî. Elçî ziqaqo ke amebî qetilkerdiş de hetê xeylê kesan ra ame yadkerdiş.
Polîsan dormeyê ziqaqo ke Elçî tede amebî qetilkerdiş, girewtî abluqa û bi kutikan reyde sehnayîş viraştî. Seba ke cayo ke Elçî amebî qetilkerdiş, daxilê qedexeyî de bî, destûr nêdîya ewja de bêro yadkerdiş. Cok ra kesê ke waştî Elçîyî yad bikerî, sereyê ziqaqî de merasîmê xo viraştî.
Cinîya Tahîr Elçîyî Turkan Elçî, parlamenterê HDP û CHPyî, serekê baroyî, akademîsyen, pawitoxê heqê merdiman, nuştox, roşnvîr, temsîlkarê rêxistinê sîvîlî û sewbîna zaf kesî beşdar bîyî. Merasîm bi rêzgirewtiş dest pêkerd. Rêzgirewtiş zî saete 10.53 ke Tahîr Elçî amebî qetilkerdiş de dest pêkerd.
Dima ra Serekê Baroya Amedî Ahmet Ozmenî qisey kerd. Ozmenî va ‘kişîyayîşê Elçîyî ra dima donemêko tarî dest pêkerd’ û wina domna: “Ganî heme hetê nê qetilbîyayîşî bêrî roşnkerdiş. Cok ra no het de hêvî û waştişê ma estî. Elçî pawitoxê heqê merdiman bî. Vernîya bi desan kamerayan de ame qetilkerdiş. Ma do sey Baroya Amedî têkoşînê serekê xo bidomnî.”
Qiseykerdişî ra dima qurnefîl û fotografê Elçîyî barîkatan ra ameyî aliqnayîş. Tayînan zî qurnefîlanê xo ser brandayan ra eştî cayo ke Tahîr Elçî amebî qetilkerdiş.
MA/AMED