28ê Kanûne 2011 de teyareyanê F-16 yê dewleta tirk, netîceyê bombevarankerdiş de, 34 kesan qetil kerd. Qetlîam serra 4. de ya, la kiştoxî hewna zî bê ceza mendî. 

28’ê Kanûne 2011î de, dewa Şirnex Roboskî de, asmen ra bombeyî vorniyayî, omid û ameyina 34 însanan, wertê bi tonan bombeyan, boyê goştê vêsnayo û perçeyanê meyîtan de bi vînî. 34 canî, 34 zerrî, 34 dîna, 34 Roboskîyijî hetê teyareyanê herbî, yê dewleta tirk, ameyî qetil kerdene. Nê 34 kesî serva debara keyeyê xo bikerê, serva ke qeçikanê xo rê leteyê nan berê, kewtî ray. 34 kesan ra xeylê ci doman-qeçekî bî. Emrê 19an mavêna 12 û 18 serrey bi. 34 kesan ra 24ê ci, malbata Encu ra bî. 


Çapemeniya Kurd qetlîam resna pêrokîn dinya

Ajansê Xeberan yê Dîcle xebera qetlîamî desînde kerd vila, Roj Tv waxtê hêsnayîsê qetlîam ra tepiya hata sodir û dima zî, bi rojan weşanê zîndî de qetil kerdena 34 kesan resna pêro dîna. La çapemeniya tirkî 12 seat bêveng mend, qetilkerdişê 34 kesan rê, gosê xo guret. 

Nî seatan de malbatê 34 Roboskîyijan ameyî bî herema qetlîam, tariya sewe de perçeyanê domonanê xo kemeran, zinaran ra kerd bî are, bi qatir û traktoran meyîtanê gencanê xo peyser ard bî dewa xo. 


Domanê bê pî

Qetlîam de tenya weşiya 34 kesan vinî nêbî. Qetlîam pey xo de, pî û mayê bê doman, doman-qeçekê bê pî û xeyalê şikitî terna, virada.  Selman Encu o ke qetlîam de weşiya xo kerd vinî, pey xo de 4 domanî-qeçekî viraday. Domanan ra Nebî, wexto ke piyê ci merd, hona pîzeyê maya xo de bi. Domanan ra Ersîn zî, badê qetlîam mektebê dewleta ke piyê ci kişt, ca verda. Osman Kaplan’î zî qetlîamê 28’ê Kanûne de weşiya xo kerd vinî û pey xo de 5 qeçekî-domanê  sêwî terna. 

Parlementerê BDP yê Şirnex Hasîp Kaplan’î hewl da ke, xo biresno serrmiyananê dewlet. La Kaplan’î rê vajiya ke, ‘dewlet îstirehat deya’! Waxtê sodir çarçoveya wahşetî hebena biye zelal, Kurdistanijî werziyay serhewedayinan. 


Erdogan wayirê qetlîam vejya

Serokwezîrê o demî Erdogan’î 2 rozî badê qetlîam qesey kerd. Erdogan eskerakerdîsanê xo de wayirê qetlîam vejiya, serokê arteşa tirkî Necdet Ozel’î, rîwalê qetlîam bimbarek kerd. 3ê Çile 2012î de, yardimkarê serokwezîrî Bulent Arinç’î zî aşkere kerd ke, dewlet ra efû waştiş şaş o û va, malbatan rê tezmînat do bîro dayen.

Malbatan Sibat’a 2012î de tazmînatê 4 milyon 182 hezar’î red kerd. Serdozgerîn 2013î de derheqê cipersyayin de qerarê bêwezîfeyî da û dosya rişt dozgerîna eskerî. Dozgerîna Eskerî zî derheqê dosya de qerarê bêtaqibî da. 

 

Cigeyrayişê edalet

Mahkemeyê tirkî zî qetlîam jê-zey ‘xeletiye’ name kerdî û jû cipersyayen rê desture nêda. Dewlete waşt ke bi perre dayene malbatan bixapîno. Çike iyê ke ameyî bî kiştene gencê kurdî bî û gorê zihnîyetê dewlete bara iyênan ciwuyayene nê, merdiş bî.  Dewleta qetilkar, cayo ke, mesûlanê qetlîam ceza bikero, malbatanê mexdûr rê, rîwalê ke qeçek-domanê xo yad kerdî ceza da. 


Dewlet wazena Roboskî yê newî virazo

Malbatî her hefte, roja pancşem, mezelxaneyê Roboskî de yenê tê-pêhet û waştena edalet qîr kenê. Hefteya ravêrdî de zî, malbatî hefteya 208. de mezelxane de nûmayiş viraştî. Ser nameyê malbatan Zuleyha Encu damûstayîn da û aşkere kerd ke, ‘heta ke yê ke na zilm û zorvajî ma rê rewa dî ceza bidê, ma dê na dawa ca nêverdê. Encû vist vîrî ke qetlîam bi Roboskî ra sînor niya û aşkere kerd ke AKP pey qetlîamanê newî de ra. Encu hayr ant êrişanê dewlet yê verra Sûr, Sîlopî, Cizîr, Nisêbîn û kerboran ser û aşkere kerd ke, bi kirêştişê 10 hezarî eskeran wazenê qetlîamê newî viraziyê. 

Qetlîam ra tepiya 4 serrî raverdî-vêrdî ra, la çi heyf ke, waştişê edalet yê malbatanê Roboskî û şarê kurdî, nêame ca. La Roboskîyijî û şarê kurd pey kiştoxan nêvirada.  A roj ra tepiya geyrayişê edalet dewamkerd. Serra 4. yê serragêra qetlîam de, onca hezarî kes yenê pêhet û kiştoxan ra hesab pers kenê. 


 NAVENDÊ XEBERAN