Qetlîama Pirsûs’î zî fina-reyna rafîna ver çiman ke endî tirkiye zî açarniya cayê herbî. AKP rîwalê bêtehamuliya kamiya Kurd û dişmeniya ci, tirkiye kirêşt jew herbê do gonîn miyan. Vatişa peynî verikîn de vaja; Mesûlê qetlîama pirsûs hikumeta AKP ya. Na qetlîam zî netîceyê polîtîkayê şaş yê AKP yê verra Suriye de viraziya. Serva-qandê ke hemwelatijî na qetlîamî ra AKP û MÎT’î mesûl bigîrê xeylê sebebî estê. Çike hikûmet roja sifte ra heta na gam her hetî ra paşt da çeteyan. Tenya desteg nêda, bi çeteyan ra piyakarî kerd. Tewr peynî de, qetlîama 25’ê Hezîran yê Kobanê zî netîceyê piyakariya dewleta tirk û çeteyan de viraziya. Herzewbîn îstixbaratê dewlet MÎT ebi TIR, ambulans û wesayîtanê dewlet çeteyan rê bombe, tifing û lejkerê newî kirêşna. Dewlet sînoranê xo serva-qandê şiyîn û ameyin, çeteyan rê akerd. Çeteyê ke lej-herbî de bî dirbetin bi ambulansanê xo kirêşt tirkiye û nêweşxaneyanê xo de derman kerd, peycoy reyna-fina rişt lej. Dewleta ke bi hezaran Kurdan dekerd girotxaneyan zerreyê welatî de serva xo tenzîmkerdiş çeteyan rê pêrokîn destegî da.
Serva piyakariya AKP û DAİŞ kes şeno hezaran nimûneyan bido û bi seyan belgeyan rafîno ver çiman. Herzewbîn zonayişê rêxistina îstixbarat yê MÎT’î zî na qetlîam ra estbî. Senî beno ke MÎT’o ke kancî Kurd kotî de se keno haya ci bena û vano ez mirîçik zî nêviradana jû bombeya ganî ra zonayişê ci nêbo? Jû serriyo MÎT, esker û polîsê dewlet qîr kenê vanê Riha de her çî bin qontrolê ma de yo! Raşto winî ayseno ke, sînor de herkes û her çî bin qontrolê dewlet de yo, la tenya çeteyî nê. Çi ke dewlet çeteyan rê pasaporta kiho-kesk dayo. Nayî ra hewce çinyo ke ma kiştoxan cayê bîn de bigeyrê. DAİŞ rêxistina gonîn yê AKP ya. AKP didi serriyo çeteyan zey kiştox, zey qontra şixûlnena û rişena ser şarê Kurd. Hikûmeta AKP ya ke her roj PYD, YPG, PKK zey terrorist bi name kena, heta nika nêşena vajo ke DAİŞ rêxistinê da terorist a. Ma jû dewlet hona senî niyetê xo aşkere bikero?
Jew qerakterê dewletan o; serva menfaatê îxtidara xo her çî ferz kena. Merdişê bi hezaran kesan serva jû dewlet çiyê do gird niyo. Zey nimûneyê sermiyananê dewleta Tirk. Badê qetlîama Pirsûs sermiyananê AKP çimê xo açarnay cayê qetlîama Pirsûs û zaf qerebênay. Qerebênayiya înan serva-qabê kesê ke weşiya xo kerdî vinî nêbî, serva ke çima homara merdişan zaf nêbî de bî. Çike qiseyanê sermiyanê dewlet ra winî ayseno ke, înan merdişê hona zaf kesan pawitî bî.
Cayo ke îstifa bikerê Erdoğan hewna werzeno şarê Kurd, hereketa serbestî tehdît keno. Arinç o ke dişmeniya Kurdan ra xo nêgêno heyf keno û vano ‘çima sermiyanê HDP qetlîam de nêmerdî’. Davutoğlu cayo ke DAİŞ lanet bikero werzeno vano PKK DAİŞ ra hona vêşî talokeyo. Vatişanê pêrokîn sermiyananê dewlet ra nê netîcey vejyenê teber;
1-DAİŞ tirkiye de qedexe niya rewa-meşrû ya û şena xo her hetî ra tenzîm bikero. Nayî ra çeteyê DAİŞ nînê tepişten, hetê hiqûqî zî raştê cezayan nînê.
2-Kam ke verra DAİŞ bivejyo do hemverê xo de dewleta tirk bivîno. Çi ke DAİŞ bin hîmayeyê dewleta tirkiye de yo. Pawitenê DAİŞ dewlet gêna.
3-Wexto ke kiştoxê qetlîama 5’ê Hezîran yê Amed û herzewbîn kiştoxê qetlîama Pirsûs amey binçimkerdin qûwetanê dewlet bi nê kiştoxan ra piya planê nê qetlîaman kerdo û riştê ser kar.
4-Dişmenê wertex yê Dewlet û DAİŞ PKK yo, neyra tepya verra PKK, şarê Kurd piyakariya hurdiyan do biramo.
5-Çapemeniya zûrker ke zey merkezê herbê teybet kar kena goreyê na kopsepta newî ameya dîzayn kerdin.
Kesê ke wijdanê xo vinî bikerê ra her qilerîn, her taloke, her xiravîn yeno pawiten. Cok ra dewlet domonan-qeçikanê zerrîpak kena tercîxê tecawizkar û kiştoxan. Cok ra jû hetî ra TIR’anê dekerdeyê tifingan ravêrnena overê sînoran, la wesayîtê dekerdeyê ‘kaykerdoxan’ rê tehamil nêkena. Dewleta kiştox zihnîyetê xo yê qilerên ravêrnayo hemwelatijanê xo zî. Xeylê kesan rîwalê qetilkerdişê Ali Can Vural, Aydan Ezgi, Ezgi Salcı, Cebrail Günebakan, Nartan Kılıç’an kêfweşiya xo ard ziwan. Kesê ke merdişan ra kêfweş benê lanet kena û domonanê wayrê xeyalê pak, omidê girdî vîr ana. Xeyalê înan dê Kobanê de, Gezî de, Roboskî de, zerriya şaranê azadîwaş de biciwyê. Sozê şima sozê ma yo; xeyalê piyaciwyayişê şaran, welatê azad do bireso serkewtiş.