Rojawa’yê welat de vizêr fina-onca jû qetlîama gonîn viraziya. Keye û kuçeyan de zey laser fina gonî rijiya. Goniya qeçik-domonan, ê pitikan, ê ceniyan, ê genç, kal û pîran rijiya. Çeteyanê minafiq û hetkaranê ci, se ra vêşî sivîlan qetilkerd û bi desanê ci zî kerd dirbetin. Însanan keyeyanê ci ra vetî û zey ke serreyê kerg, dîk, mî cikenê, serreyê ci cikerdî. Nêvatî qeçekê werdî yê, cenî yê day ver guleyan. Herzewbîn bombe tekînay. Û nê minafiqan no çî aşma rocî, remezan de bi nameyê dîn, mislimantî kerdî.
Sebebê komkişten çiçîyê?
Jû-yew ra vêşî sebebê xo estê. Çeteyanê bê esil Rojawa de aşmanê peyenîn de derbeyê girdî werdî û prestîjê xo kerdî vinî. Derbeya peynî 15’ê Hezîran de Girê Spî de werdî. Qûwetanê pawitenê rojawa badê didi serran qontrolê Girê Spî girot destê xo û çeteyî sûk ra vetî. Çeteyê ke Girê Spî de binkewtî remyay hetê Tirkiye û cayanê bîn. No binkewtiş him çeteyan, him zî piyakarê ci Tirkiye kerd hêrs. Sebebê sifteyîn yê qetlîama vizêr heyf girotiş bi.
Sebebê bîn; yê sereştişa qilêrîn-leymin vistişê prejtîjê YPG-J yo. Çi ke DAİŞ Irak û Suriye de derbeyê girdî qûwetanê Kurdan ra werdî. Heta nika kesî verniya çeteyan nêgirot û pê ra herb nêkerd. Tenya qûwetê Kurdî hemverê çeteyan de xover day û ‘efsaneyê gird’ yê çeteyan qedînay. Heta bîn ra; DAİŞ o ke moral û motîvasyonê ci yo herb nêmendo, serva-qandê ke moral-quwet bido azayanê xo qetlîamê da niyayîn viraşt. Herzewbîn bi na qetlîam çeteyan waşt verniya ageyrayişê sûk bigîrê. DAİŞ bi na hêriş mesaj da ke sûk de ciwyana kesî bin garantî de niya. Meyerê sûk, çi ke ma şenê heta keyeyê şima bîrê û şima bikişê. Babeda bîn ya mihîm zî naya ke; DAİŞ terseno ke qûwetê YPG-J û Burkan El Firat Cerablûs û kêberê sînor yê Raî û merkezê xîlafet Raqa zî bikero hedef. Bi na ters kewtî hereket û qetlîama tewr gonîn viraştî.
Hêrişkarî kancî hetî ra kewtî sûk?
Persa mihîm na ya! Badê hêriş beyanatê sifte kişta Tirkiye ra amey. Sermiyananê Tirkiye desinde ardî ziwan ke hêrişkarî kişta Cerablus ra ameyê. Rindo, la nê sermiyanî na zonayiş kotî ra girotî? Herzewbîn ardî ziwan ke destê înan de belgeyî estê. La çi qe dewleta Tirk hewl bido xo pak vejo û sucê xo berzo cayanê bîn ser, pêrokîn îbareyî damisnenê ke çeteyî kişta Tirkiye ra ravêrnayê. Çi ke ser raya Helince, Cerablus û Halep ra ravêrnayiş zaf zehmet o. Ser ray de xeylê noqteyê qontrolî estê. Xo ra çeteyê ke 15’ê Hezîran de Girê Spî ra remyay şî Tirkiye. Tirkiye zî wayirîyê ci vejya. Herzewbîn polîtîkayê dewleta Tirk yê Rojawa yena zonayen. Na babed de kamî-sicîl’a ci zaf leymin-qilerîn a.
Medya ya herb yê Tirkiye se vati bî?
Ajansê Anadolû bombevaranê verra Kobanê desinde ant qamerayanê xo. Tiya de gerek ma na pers bikerê: Na ajansî seatê sodir de senî zanabî ke hêriş do viraziyo? Na ajansa herbî zey ke filîm ancena bombevarankerdişê Kobanê zindî-ganî weşîna. Winî ayseno ke xebera sereştişî veriya ra zana bî. Veriya coy zî medya ya Erdoğan’î manşetî eştî û vatî; “PYD DAİŞ ra hona vêşî talokeyî yo. Jew rojnameyê bînî zî ardibi ziwan ke; “No herb do zaf bibo gird”. Medya ya herbî zî zey îxtidar serkewtişê Girê Spî hezm nêkerd û propagandayê heyf girotiş kerdî.
Çiyo ke wazena vaja; tenya rolê ci nê, dewleta Tirk na qetlîam bi DAİŞ ra piya viraşt û do hesabdayiş ra nêreyno. Çi ke hereketê serbestî yê Kurd pêrokîn plan, proje û stratejiyê dewleta Tirk yê rojhelatê miyanî pûç vet. Nayî ra verra Kurdan AKP zaf hêrsa. Cok ra qetlîamanê niya-winayî virazena.
La bi nê hemleyanê şaş û talokeyî AKP lez dana peynî ameyişê xo.