ERDOGAN ALAYUMAT / MA / SEMSÛR
Mustafa Çelenko ke Semsûr de cuyeno û resamîye keno. Çelenk wendişê kitaban ra zaf hes keno labelê seba ke hetê ekonomîke de probleman cuyeno, karêko bi mana dayo dest pêkerdene; Çelenk portreyanê kesan xêz keno û herinda heqê keda xo kitab û sewbîna çîyan gêno.
Babete ser o Çelenk dîyar kerd ke o kitabanê xo bi no hawa peyda keno û wina va: “Bi desan kitabê ke ez nêşêna bigîra, estî. Cok ra ez yê ke wazenî portreya xo bidî xêz kerdene ra vana ‘eke ti nê kitabî bigîrî/a portreya to amade ya’. Ge-ge zî destê kamî de çi kitab bibo, ez gêna. Labelê ez heme kitaban nêgêna. Tayê kesî pere pêşnîyazê mi kenî, ez vana ‘eke şima zaf wazenî, mi rê filan kitabî biherînê’ ê kesî zî şaş manenî. Ez nêwazena bi pereyî kar bikera.”
Çelenkî dewamê qiseykerdişê xo de wina va: “Ez kitabanê xo wendekarê ke ez ders dana înan reyde pare kena. Ez ge-ge kesê ke wazenî portreyanê xo bidî xêz kerdene ra boyax, qeleme û kaxiz wazena. Ez bi no hawa lazimîya xo ya resmî peyda kena. Ez teber de dêsan ser o resman xêz kena û bi no qeyde lazimîyanê xo vejena. Ez do ameyoxe de sewlî, toxim û kel-melanê kehenan zî biwaza. Ez wazena nêyî hîna zaf zêde bikera.”