Hetê TUYAPî ra bajarê Amedî de fûarê kitaban ame organîze kerdene. Fûar 25ê êlule de dest pêkerd û do heta 30ê êlule dewam bikero. Pêro pîya 120 weşanxaneyî beşdarê fûarî bîyî û fûar Merkezê Kongre û Fûarî de yeno viraştene.
Eleqeyêko gird fûar rê esto û bitaybetî standê weşanxaneyanê kurdî eleqeyêko gird vînenî. Herçiqas ke wina bo zî kitabê ke tewr zaf eleqe vînenî, qedexekerde yî. Bitaybetî kitabê bi nameyê ‘Kurt Ulusal Hareketî’, ‘Kurtler ve Kurdîstan’ û ‘1880 Kurt Ayaklanması’ yê Weşanxaneyê Avesta nînan ra tayê ci yî.
Babete ser o xebatkaranê Weşanxaneyê Avesta Songul Keskîne dîyar kerde ke ‘qedexe ziwanê kurdî rê beno’ û wina va: “Verê cû hetê ziwanî de tayê qezencê ma estbî. Nika reyna qezencanê ma qedexe kenî û mudaxaleyê cuya ma kenî. Nê qedexeyî bi temamî kêfî yî û goreyê huqûqî nîyî. 6 aşmanê peyênan de hema vaje heme kitabê ma yê ke vejîyayî, ameyî qedexe kerdene. Dozgerêk daxî eşkeno, kêfî qedexe bikero.”
Reyna 89 kitabê weşanxaneyê Aramî zî qedexekerde yî. Xebatkarê Aramî danî zanayene ke kitabê ke qedexe bîyî, heme zî yê ke eleqe vînenî yî. Kitabê ke tewr zaf raştê eleqeyî yenî, nêyî: Puç oldum (Vedat Çetîn), Bîr Savaşin Anatomîsî (Murat Karayilan), Gun Işiginda Zap (Ahmet Tahîr), Bogurtlen Zamani (Murat Turk), Kasirga Taburu (Mehmet Sebatli) û Jînelojî.
Aram ra 5 kitabê neweyî
Heto bîn ra weşanxaneyê Aramî ra 5 kitabê neweyî ameyî çap kerdene. Weşanxaneyî kitabê bi nameyê Topragin Şarkisi yê Rojbîn Perîşane, Hakîkat Rejîmî yê Ergun Atabeyî, Sifira Yukselmek yê Zekî Bayhanî, Lênûska Leyla yê Menaf Osmanî û Nîşanci yê Metîn Aktaşî zî newe ra ame çap kerdene. Kitabî fûar de ameyî wendoxan ver. Teberê weşanxaneyê Aram û Avesta de weşanxaneyê Aryen, Peyvend, Nubihar, Lîs, Sîtav, Dara, Ava, J&J.
AMED