Eserê Kirmanckî ke tarîx de ameyê nuştiş û vinî bîye, hêdî-hêdî vejyenê werte. Nînan ra yewe zî eserê Muhemmedê Şêx Ensarî “Raro Raşt” û “Meʿlûmatê Dînîye” yo. Nê eserê ke zey eserê 3. ê Kirmanckî yenê qebûlkerdîş û 1947-1948 de amêbî nuştiş, hetê Bîlal Zîlanî seba çapî amey hadrekerdîş. Eserî nê rojanê peyenî de Weşanxaneyê Vate ra vejîyayî.
Yewîn eserê Kirmanckî mewlidê Ehmedê Xasî ke 1899 de vejîya û eserê 2. yê Kirmanckî mewlido ke Usman Esad Efendî yo Babijî 1903 de nuşt ra dima, nika kî eserê 3. û 4. yê Kirmanckî çap bî. Kitabo ke tewr verî ameyo nuştene "Raro Raşt û Me'lûmatê Dînîye" ê Muhemmedê Şêx Ensarî resya wendoxan. Kitabê “Raro Raşt” û “Meʿlûmatê Dînîye” yê Şêx Muhemmedê Şêx Ensarî ke 1947-1948 de amêbî nuştiş, hetê Bîlal Zîlanî çapî rê amey amadekerdîş.
Vateyê Verenî yê Kitabî ra
Amadekerdoxê nê eseran Bîlal Zîlan’î vateyê verenî yê kitabî de wina vato:
".... Edebîyatê kirdkî (zazakî) serra 1899 de bi weşanîyayîşê mewlidê Ehmedê Xasî dest pêkerdo. No tarîx destpêkê edebîyatê kirdkî yê klasîkî yo zî. Dima, 1903 de Usman Esad Efendî yo Babij yewna mewlid nuseno. Kitabê Raro Raşt û Meʿlûmatê Dînîye yê Şêx Muhemmedê Şêx Ensarî 1947-1948 de nusîyayê. Hetê kronolojîkî ra, nê kitabê kirdkî yê hîrêyin û çarin ê. La bêxeyja çend kesan hayîya kesî nê kitaban ra çin bî...”
NAVENDÊ XEBERAN