Konseya Revêber a Kongreya Neteweyî ya Kurdistanê di nameya xwe ya ji bo Serokwezîrê Hikûmeta Herêma Kurdistanê Nêçirvan Barzanî de diyar kir ku ew gelekî kêfxweş in ku hikûmeta nû bi lihevhatineke mezin a weke koalîsyona neteweyî û niştmanî hatiye avakirin.

Di nameyê de hat destnîşankirin ku di nava şert û mercên hesas û nazik ên Rojhilata Navîn de, damezrandina hikûmeta nû, hewcehiyeke lezgîn bû û wiha hat gotin:
“Prosesa rizgarî û azadiya Kurdistanê hatiye qonaxeke nû û destkevtên doza Kurdistanê her diçe zêde dibin. Li seranserê Kurdistanê û meydanên dîasporayê hêviya serkevtinê ya xelkê Kurd û Kurdistaniyan bilind bûye. Hebûna Herêma Kurdistanê, avabûna nû ya Xweserîya Demokratîk ya Rojavaya Kurdistanê û pêşkevtina têkoşîna li bakur û rojhilata Kurdistanê hemû Kurd û Kurdistaniyan li ser pêşeroja Kurdistanê geşbîn û hêvîdar dike.
Bi bîr û hizirên neteweyî û welatî ve em we, hikûmeta we, pêkve wezîrên we pîroz dikin. Em wekî KNK partiyên ku li ser esasê berjewendiyên neteweyî û niştimanî hikûmeta we ya koalisyonê pêk aniye jî teqdîr dikin.  Bila hikûmeta we serfiraz û serkevtî be” 

BRUKSEL