Bajaranê Rojawanî ra Kobanê 27ê çileyê 2012 de bi temamî ame azadkerdiş û Kantonê Kobanê ame îlankerdiş. Emser Serrgêra 3. ya awanbîyayîşê Kobanê yo.Babete ser o Fermandarîya Pêroyî ya YPJyî ra Nesrîn Ebdullahe qisey kerde. Nesrîn Ebdullahe dîyar kerde ke ‘averşîyayîşê ke Kobanê de benî û serkewtişêko ameyo qezenckerdiş de keda bi hezaran merdiman esta’ û wina va: “Her çiqas ke hende bedelê giranî ameyî dayîş, reyna zî vindetişo rûmetin ra tavîz nêame dayîş. Hem şar û hem zî şerwanî bi hawayo bêmabên wayîrê xeta azadî vejîyayî.”
Yeno manaya mergî
Nesrîn Ebdullahe dewamê qiseykerdişê xo de va ‘projeya xoserî yan zî neteweya demokratîke netîceyê keda ke ameye dayîş de vejîya orte’ û wina dewam kerde: “Dejê girdî yê 2016î ra dima ma bi hêvîyanê girdan kewtî 2017. Şaran dejê girdî cuyayî û bedelanê giranan dayî. Ma yewna rey fam kerd ke eke ma biwazî problemanê şaran çareser bikerî, no ancax bi projeya neteweya demokratîke mumkin o. Na raştî Sûrîye û Îraq de ameye dîyayîş, zîhnîyetê netewe dewlete yeno manaya hîna zêde merg. Projeya federalîzmî projeya vindarnayîşê mergan o.”
Yê heme şaran o
Nesrîn Ebdullahe qiseykerdişê xo de va ‘yê ke Kobanê de şehîd kewtî, çar parçeyê Kurdistanî ra ameybî’ û wina domnaye: “Şehîd Gulane Êlih, şehîd Destîna Başûrê Kurdistanî, şehîd Arîne Rojawanê Kurdistanî û şehîd Jîyane zî Rojhelatê Kurdistanî ra kewtbî rayîr û ameybî Kobanê. Xoverdayîşê nê embazan seba yewîya neteweyî seba çar parçeyê Kurdistanî bî nimûne. Cinîyê ke Kobanê de xover dayî, bedenê xo kerdî sîper û vernîya çeteyanê DAIŞî de bîyî asteng.”
Beyraqa xoverdayîşî cenîyan kirêşt
Nesrîn Ebdullahe peynîya qiseykerdişê xo de wina va: “Her çiqas ke serewedaritişê kurdan ameyî fetisnayîş, reyna zî şarê kurdî fek serewedaritişî ra veranêda. Kobanê bîye Kobanêya cinîyan. Çimkî yê ke azadî de israr kerdî û beyraqa xoverdayîşî kiriştî cinîyî bîy. Ma do bi heme hêzê xo seba ke Kobanê bikerî bajarê cinîyan têkoşînê xo gird bikerî û Sûrîyeyêka demokratîke rê rayberî bikerî. Ma do heta ke gêrayîşê heqîqetî ke saya Kobanê de yewna rey vejîya orte û tarîxê cinîyan ke hetê zîhnîyetê camêrdî ra ameyo verpaykerdiş, vejîyo orte, têkoşînê xo bidomnî.”
ŞÛJIN/KOBANÊ