SARA TOLHILDAN / JINNEWS / KOBANÊ
Seke yeno zanayîş 2014 de Kobanê de vera çeteyanê DAIŞî de xoverdayîşêko tarîxî amebî nîşandayîş û cok ra 1ê Teşrîna peyêne sey Roja Kobanê ya Dinya amebî îlankerdiş. Babete ser o Hemsereka Konseyê Caardişî yê Demokratîk yê Vakurê Sûrîye Foza Yusufe qisey kerde.
Yusufe qiseykerdişê xo de va ‘herkes zanayêne ke eke Kobanê bikewo, do şarê kurd û merdimîye zî bikewî, cok ra beşdarê têkoşînî bîyî’ û wina dewam kerde: “Heme şervanî goreyê na raştîye xover dayî. Merdim nêşêno nê xoverdayîşî bi çekuyan vajo. Xoverdayîşê Kobanê kurdîtî, raştîya cinîye û merdimîye kaşî ver ra firnayî. Cinî û merdimîye bierj kerdî. Kobanê de raştîka zî mucîzeyêk virazîya. Na mucîze bi îradeya şerwanan bîye. Kobanê bîye merkezê erjê komunalan.”
Yusufe dîyar kerde ke ê taxmîn nêkerdêne ke Kobanê de newe ra awanbîyayîş hende rew bibo û wina va: “Şarê Kobanê zaf girêdayeyê erdê xo yo. Kobanê demêko kilm de ameye xo ser. Kobanê wela xo ra xo newe ra awan kerde. Êdî Kobanê de ti keye bê ban, ti doman zî bê mekteb nîyo. Ma newe ra awanbîyayîşê Kobanê 3 hetan ra girewt dest; hetê fikrî, hetê xizmetî û hetê îdarî ra. Nika şaredarî, meclîs û pawitişo bihêz yê Kobanê estî. Kobanê de nika hetê fikrî de seba awankerdişê paradîgma, akademîyê cinî, sîyaset û yê ekonomîye ameyî ronayîş. Heta lîseyî mekteb û fakulteyî daxî estî. Hetê xizmetî de şaredarîyî ronîyayî. Sîstemêko îdarî ke bingeyê ci de hemserekî esta, ame ronayîş. Şar bi hawayo gird beşdarê weçînayîşê komunan bî. ”
Bi felsefeya Rayber Apoyî xover da
Yusufe va ‘ruho xoverdakar û erjî serranê peyênan de awan nêbî’ û wina dewam kerde: “Nêy bi têkoşînê azadîye yê 40 serran game bi game ameyî awankerdiş. Kobanê xo rê felsefe û paradîgmaya Rayber Apoyî esas girewte û wina xover daye. Erjê ke Rayber Apoyî Kobanê de awan kerdî, destûr nêdayî ke Kobanê de teslîmîyetêkî bibo. Kobanê de nasnameyê ‘kurdo azad’ bi serran verê amebî xelqkerdiş û bi xoverdayîşê Kobanê zî herkesî nê dî. Kobanê de kurdo newe û erjê merdimîya azade pêresayî. Eke no ruh nêbîyêne, serkewtiş zî nêameyêne.”
Sûrîye de îstîkrar awan nêbîyo
Yusufe peynîya qiseykerdişê xo de wina va: "Êdî kurdo ke bawerîya ci bi xo nîno û xo înkar keno, wextê ci pirr bîyo. Herinda nê kurdî de Rayberê Şarê Kurdî Abdullah Ocalanî nasnameyêko newe û azade awan kerdo. Ameyoxe de prosesê zehmetin û birîsk estî. Çimkî Sûrîye de hîna îstîkrar awan nêbîyo. Eke ma nê prosesî bi hawayo baş bigîrî dest, o wext ma do seba Kobanê mîladêko newe bidî destpêkerdiş. Ez veng dana heme hêzanê demokratîk û azadîwaştoxan ke wa seba îradeya ortaxe û hedefê ortaxî yê merdimîye têkoşînê xo gird bikerî.